Բժշկական ապահովագրությունը կներդրվի 3-4 տարուց. Արսեն Թորոսյան

Բժշկական ապահովագրությունը կներդրվի 3-4 տարուց. 2019 թվականի բյուջեի քննարկման ժամանակ հայտնեց առողջապահության նախարարի պաշտոնակատար Արսեն Թորոսյանը: Նա տեղեկացրեց, որ հիմա աշխատում են հայեցակարգային  փաստաթղթի վրա, որում սահմանված կլինի,  թե ինչպիսի ապահովագրություն են ուզում տեսնել:

«Մեզ նման երկրներում արդյունավետ են մեկ գնորդի կողմից իրականացվող ապահովագրական համակարգերը, երբ ապահովագրական հիմնադրամը մեկն է, և այդ այդ հիմնադրամը կա'մ պետական է, կա'մ հանրային: Այն չպետք է լինի մասնավոր: Եթե դա մասնավոր չէ, թույլ կտա ունենալ մեծ գնողականության ուժ, երբ դու ես շուկայում թելադրում ծառայությունների գները, ի տարբերություն մասնավորի»,- ասաց Թորոսյանը:

Ըստ նրա` դա  ադմինիստրատիվ ծախսերի մեծ տնտեսում անելու հնարավորություն կտա:  Թորոսյանի խոսքով` խնդիրը չաշխատողների հարցն է: «Այսինքն` բժշկական ապահովագրությունը ներդնելիս  պետությունը պետք է հասկանա` դա ընդամենը 500 հազար հոգի աշխատողի համա՞ր է, թե՞ մնացած բոլորի համար էլ, ովքեր չեն աշխատում»,- ասաց Թորոսյանը: Նա հավելեց, որ մեր ապագան դա է` բժշկական ապահովագրությունը, որը կներդրվի 3-4 տարուց: