Սերժ Սարգսյանը շատ հարգանքով վերաբերվեց իմ որոշմանը. Գևորգ Կոստանյան

Եթե դուք մի անգամ լսեք իմ ելույթը, այլ  ոչ թե վերնագրերով միայն ծանոթանաք, կհասկանաք, որ խոսքս վերաբերել է բացարձակապես նրան, որ Փաշինայնն ազնիվ է իր նպատակների մեջ, ազնիվ է իր ցանկությունների մեջ, բայց պետական կառավարման փորձ չունի: Այս մասին խորհրդարանում լրագրողներին ասաց ԱԺ ՀՀԿ խմբակցության պատգամավոր Գևորգ Կոստանյանը:

Հարցին` հիասթափություն չկա՞ կուսակցությունում և Սերժ Սարգսյանի մոտ իր հանդեպ, նա արձագանքեց. «Սերժ Սարգսյանը շատ հարգանքով է ընդունել իմ որոշումը, և նա միշտ հարգանքով է վերաբերվում բոլորի որոշմանը: Իսկ թե մամուլում ի՞նչ են գրում, ո՞նց են գրում, 48-երորդական հարցեր են»:

Ճշտող հարցին էլ` նորմալ ընդունե՞ց, որ խմբակցությունում է մնում, բայց  աջակցում է Փաշինյանին, Կոստանյանը  կրկնեց, որ Սերժ Սարգսյանը շատ հարգանքով վերաբերվեց իր որոշմանը: «Ինչ վերաբերում է ֆրակցիայի հետ հակասություն փնտրելուն, ես այստեղ էլ հակասություն չեմ տեսնում մեկ պարզ պատճառով, որովհետև նույն օրը ֆրակցիան էլ հայտարարություն տարածեց. այստեղ որտե՞ղ հակասություն կար»,- նշեց նա:

Կոստանյանը շեշտեց, որ ինքը երբեք  իրեն թիմից հեռու չի պահել  ու չի պահում: «Ուղղակի ուզում եմ հասկանանք` ես կուսակցական չեմ եղել ու չեմ լինելու երբեք, որովհետև կուսակցական լինելու պարագայում դու կաշկանդված ես կուսակցական շահերով, կանոններով և կարգապահությամբ:  Ես երբեք չեմ եղել կուսակցական` հենց այն նկատառումից ելնելով, որ ես երբևէ ո'չ  կուսակցական, ո'չ քաղաքական կաշկանդվածություն չունենամ` իմ դիրքորոշումը արտահայտելու տեսակետից: Ինչ վերաբերում է թիմի անդամին, ես եղել եմ և մնում եմ թիմի անդամ»,- եզրափակեց նա: