Եթե մեր կառավարությունը Հռոմի պապից ավելի կաթոլիկ է, դա շատ լավ է. Գևորգ Կոստանյան

ԱԺ պետաիրավական և մարդու իրավունքների մշտական հանձնաժողովում քննարկվում է «Օտարերկրացիների մասին» օրենքում փոփոխություն և լրացում կատարելու մասին օրինագիծը երկրորդ ընթերցմամբ ընդունելու հարցը: Հիմնական զեկույցով հանդես եկավ փոխոստիկանապետ Վարդան Եղիազարյանը: Նա ներկայացրեց, որ օրենքով ամրագրվելու է, որ օտարերկրացիներին հատուկ կացության կարգավիճակ տալու որոշումը կայացնելու է ոչ թե նախագահը, այլ վարչապետը:

«Առաջարկվում է, որ եթե հատուկ կացության կարգավիճակ տալու դիմումը մերժվեց, օտարերկրացին կարողանա բողոքարկել»,- ասաց նա:

Այս դրույթը դուր չեկավ հանձնաժողովի անդամներին: Բոլորը տարակուսանք հայտնեցին: Հանձնաժողովի նախագահ Գևորգ Կոստանյանի համար անհասկանելի էր, թե ինչու են փոփոխություն առաջարկում: «Հիմա որ դուք այլ երկրի դեսպանատուն եք դիմում՝ մուտքի արտոնագիր տալու համար, մերժվում եք, հետո բողոքարկո՞ւմ եք: Բողոքարկման ինստիտուտը տրվում է քաղաքացուն, որ պաշտպանի իր իրավունքները: Հատուկ կարգավիճակ տալը, մուտքի թույլտվություն տալը ինստիտուցիոնալ առումով նույնն է, դա պետության իրավունք է, քաղաքացու իրավունք չէ: Մենք բողոքարկման իրավունք ենք տալիս, որ իր ո՞ր իրավունքը պաշտպանի»,- հետաքրքրվեց նա:

«Ելք» խմբակցության պատգամավոր Էդմոն Մարուքյանը նշեց, որ մուտքի արտոնագիր ստանալն ու կացության կարգավիճակ ստանալը չի կարելի նույն հարթության վրա դիտարկել: «Մուտքի արտոնագիր տալու համար մեկ այլ պետություն մտնելու համար ես դիմում, կացության համար դու գտնվում ես այդ երկրի տարածքում: Եթե մերժում են կացությունդ շարունակել, պետք է արդյունավետ վիճարկելու հնարավորություն ունենալ»,- ասաց նա:

«Ելք» խմբակցության պատգամավոր Արտակ Զեյնալյանի կարծիքով էլ` եթե բողոքարկման հնարավորությունները չլինեն, մենք լրջագույն խնդիրներ ենք ունենալու միջազգային ատյաններում, քանի որ միջազգային պարտավորություններ ենք ստանձնել: «Եթե դու անձին տալիս ես կացության կարգավիճակի իրավունք , այդ իրավունքը նա արդեն ունի, հետևաբար` պետք է ունենա նաև մերժումը բողոքարկելու հնարավորություն՝ դատական կամ արտադատական կարգով»,- ասաց նա:

ԱԺ «Ծառուկյան» խմբակցության պատգամավոր Գեւորգ Պետրոսյանն էլ ընդգծեց, որ այստեղ պետության ինքնիշխանության խնդիր կա, եթե ամեն օտարեկրացի, որին մերժում են կացության կարգավիճակ տալ, վիճարկի, պետությունը պետք է ընկնի այդ վեճերի մեջ: «Բողոքարկումը կա'մ պետք է բացառել, կա'մ պետք է խիստ սահմանափակել»,- ասաց նա:

Գևորգ Կոստանյանը նշեց, որ սա ինքնիշխանության հարց է: «Պետությունը որոշում է` ում իր երկիր թողնի, ինչքան ժամանակով և ինչ պայմաններով: Սա տրված է պետությանը, պետության իրավունք է: Ազատ տեղաշարժվելու իրավունքն էլ բացարձակ իրավունք չէ, սահմանափակ է»,- ասաց նա, ապա օրինակ բերեց, թե ինչպես կարող է բողոքարկման իրավունք տալը մեր երկրի դեմ օգտագործվել: «Եթե Թուրքիայի բնակչության 40 տոկոսը դիմի մեզ՝ կացության կարգավիճակ ստանալու համար, ու մենք մերժենք, բոլորը գան այստեղ բողոքարկեն, ի՞նչ կլինի: Կամ` Սիրիայի բնակչության 95 տոկոսը դիմում է Գերմանիային, ասում է՝  բոլորս ուզում ենք հատուկ կարգավիճակ: Եթե այդպես լիներ, «փախստական» հասկացությունը չէր լինի, բոլորը հատուկ կարգավիճակ կստանային»,- նշեց Կոստանյանը և հավելեց, որ եթե մեր պետությունն ուզում է նման բան անել, ինքը դեմ է:

Փոխոստիկանապետը համաձայնեց Կոստանյանի ասածներին, բայց նշեց, որ բողոքարկման ինստիտուտ այլ դեպքերում նախատեսված է:

Թեև հանձնաժողովի բոլոր անդամները դեմ արտահայտվեցին նախագծին, բայց կողմ քվեարկեցին: «Մենք, դեմ լինելով, կողմ ենք: Ես չէի անի այդպիսի բան, բայց եթե մեր կառավարությունը Հռոմի պապից ավելի կաթոլիկ է, դա շատ լավ է»,- ասաց Կոստանյանը:

Ի վերջո, նախագիծն ընդունվեց: