Ազնավուրն օրեր անց պետք է Հայաստան ժամաներ

Տեղեկացրել ենք, որ այսօր կյանքից հեռացավ սիրված ու աշխարհահռչակ շանսոնյե Շառլ Ազնավուրը:

Yerkir.am-ի տեղեկություններով՝ Ազնավուրն օրեր անց պետք է ժամաներ Հայաստան՝ ներկա գտնվելու Ֆրանկոֆոնիայի Երևանի գագաթաժողովին: Ավելին՝ հոկտեմբերի 11-ին նախատեսված էր նրա ելույթը Հանրապետության հրապարակում:

Ազնավուրը Հայաստան էր եկել 2017-ի գարնանը՝ ներկա գտնվելու մայիսին 28-ին կայանալիք «Ավրորա» մրցանակաբաշխության արարողությանը: Իսկ մայիսի 29-ին Ալ. Սպենդիարյանի անվան օպերայի և բալետի ազգային ակադեմիական թատրոնում նա ներկա էր իրեն նվիրված  «Լա Բոհեմ» մեկ գործողությամբ բալետային ներկայացման առաջնախաղին: Հունիսի 1-ին նույնպես Ազնավուրին նվիրված համերգ էր՝ «Քեզ համար, Ազնավո′ւր» խորագրով, որին ներկա էր երգիչը։