Օրն ու ժամը նշանակված է. ՊԵԿ նախագահը՝ Սեյրան Օհանյանի հարցաքննության մասին

Այսօր, նախքան կառավարության նիստը, լրագրողների հետ ճեպազրույցում ՊԵԿ նախագահ Դավիթ Անանյանն անդրադարձավ ՊԵԿ կողմից նախկին պաշտպանության նախարար Սեյրան Օհանյանին հարցաքննության կանչելու փաստին:

Նշենք, որ ՊԵԿ-ը հայտարարություն էր տարածել, որ Սեյրան Օհանյանը քրեական գործի շրջանակներում կանչվել է հարցաքննության, մինչդեռ Սեյրան Օհանյանը հայտարարել էր, որ չի ստացել ծանուցում:

ՊԵԿ նախագահը չպատասխանեց այն հարցին, թե արդյո՞ք Սեյրան Օհանյանը, որպես մեղադրյալ, հետագայում կներգրավվի  այդ քրեական գործում ` ասելով, որ դեռ նախաքննություն է ընթանում, ուստի նման տեղեկատվություն հայտնելը օրենքին դեմ է:

Դավիթ Անանյանը տեղեկացրեց, որ ՊԵԿ-ը ծանուցում ուղարկել է Սեյրան Օհանյանին հունիսի 12-ին: Հունիսի 13-ին Սեյրան Օհանյանը հայտարարել է, որ ծանուցում չի ստացել, և ՊԵԿ նախագահի խոսքով` երկու տեղեկատվությունն էլ կարող են լինել իրականություն, այսինքն` հնարավոր է, որ Օհանյանը դեռ ստացած չլինի ծանուցումը:

«Պարոն Օհանյանը կանչվել է հարցաքննության, մոտակա օրերին նշանակված է օր և ժամ այդ հարցաքննության համար: Կոնկրետ կազմակերպության նկատմամբ քրեական գործ կա հարուցված, կան անձինք, ովքեր սերտ առնչություն են ունեցել այդ կազմակերպության հետ, և քանի որ Սեյրան Օհանյանի պաշտոնավարման ժամանակ է եղել այդ քրեական գործը, բնականաբար, նա կկանչվի հարցաքննության: Դա սովորական գործառույթ է` քրեական գործի շրջանակներում: Նա միակ պաշտոնյան չէ, որ կհարցաքննվի, Սեյրան Օհանյանը կհարցաքննվի վկայի կարգավիճակով»,- ասաց ՊԵԿ նախագահը: