Մարգվելաշվիլին հանդիպել է բողոքի ակցիայի մասնակիցների հետ

Վրաստանի նախագահ Գեորգի Մարգվելաշվիլին ուրբաթ հանդիպել է բողոքի ակցիայի մասնակիցների հետ. հայտնում է ТАСС-ը` Վրաստանի նախագահի աշխատակազմին հղումով:

Մարգվելաշվիլին և ակցիայի նախաձեռնող Զազա Սարալիձեն հանդիպում են ունեցել խորհրդարանի շենքի մոտ տեղադրված վրաններից մեկում:

Հիշեցնենք, որ երեկվանից Թբիլիսիում բողոքի ցույցեր են սկսվել: Բանն այն է, որ Թբիլիսիի քաղաքային դատարանը 2017 թվականի դեկտեմբերի 1-ին մայրաքաղաքի դպրոցներից մեկում տեղի ունեցած զանգվածային ծեծկռտուքի հետևանքով մահացած երկու անչափահասների գործով որոշումն էր հրապարակել։ Ըստ որոշման՝ անչափահասներից միայն մեկի սպանության մեջ կասկածվողին է դատարանը մեղավոր ճանաչել։ Դատարանի որոշումը բողոք էր առաջացրել: Ակցիայի մասնակիցների կարծիքով` հետաքննությունն արդար չի եղել, և փորձ է արվում պատժից ազատել միջադեպի մասնակիցներից մեկին` դատախազության նախկին աշխատակցի որդուն: