Օրենսդրական դաշտում է և հակասահմանադրական չէ. Հարություն Կարապողոսյանը` Սերժ Սարգսյանի` վարչապետի թեկնածու առաջադրվելու մասին

Եթե հարցն օրենսդրական դաշտում է և ոչ հակասահմանադրական, միանշանակ ընդունելի է` անկախ նրանից` կուսակցության անդամ եմ, թե` ոչ. խորհրդարանում լրագրողներին ասաց ՀՀԿ խմբակցության պատգամավոր Հարություն Կարապողոսյանը` անդրադառնալով Սերժ Սարգսյանին վարչապետ առաջադրելուն:

«Ես խմբակցության անդամ եմ, և քաղաքական որոշումները պարտադիր են բոլորի համար»,- ասաց նա:

Դիտարկմանը` Սերժ Սարգսյանը հայտարարել է, որ չի հավակնի վարչապետի պաշտոնին, փաստորեն, դրժում է խոստումը, պատգամավորը պատասխանեց. «Դա էմոցիաների դաշտից է, այդպես չեն քննարկվում դրանք: Ես ասացի իմ տեսակետը` հակասահամանադրական չէ և օրենքի սահմաններում է»:

Իսկ արդյո՞ք  վարչապետի այլ թեկնածու ունի: Այս հարցին Կարապողոսյանը պատասխանեց. «Իհարկե` ոչ: Ի՞նչ է նշանակում, ո՞նց եք պատկերացնում` յուրաքանչյուր պատագամավոր վարչապետի մի հատ թեկնածու ունենա: Դուք կարող է ուրիշ թեկնածու ունենայիք, ես` ոչ»:

Հարցին` կարծում է, որ Սերժ Սարսգայնն անփոխարինելի՞ է, պատասխանեց, որ կարևորը նրա առաջադրվելը հակասահմանադրական չէ, մնացած հարցերը երկրորդային են իր համար: