Ուզում եմ արժանին մատուցել ՀՀ նախագահ Սերժ Սարգսյանի քաղաքական հեռատեսությանը. Արմեն Սարգսյան

Տեղեկացրել էինք, որ ՀՀ նախագահի երդման հանդիսավոր արարողության և պաշտոնը ստանձնելու կապակցությամբ, ՀՀ Սահմանադրության համաձայն, հրավիրվել է ԱԺ հատուկ նիստ, որը տեղի է ունենում Կ. Դեմիրճյանի անվան մարզահամերգային համալիրում:

Արմեն Սարգսյանը ելույթում մասնավորապես նշեց. «Ես գնահատում եմ այն վիթխարի աշխատանքը, որ վերջին 3 տասնամյակների ընթացքում կատարվել է ՀՀ երեք նախագահների օրոք: Ժամանակը, իհարկե, լիակատար գնահատական կտա մեր անցած ուղուն, սակայն այսօր կարելի է ամենայն անաչառությամբ ասել՝ ԽՍՀՄ փլուզման, Սպիտակի ավերիչ երկրաշարժի, Արցախի գոյամարտի, քայքայված տնտեսության պայմաններում, այնուամենայնիվ, մեզ հաջողվեց ստեղծել պետական կուռ համակարգով, բաց հասարակության գաղափարով և համամարդկային արժեքներով առաջնորդվող երկիր, երկիր, որը վայելում է համաշխարհային հանրության հարգանքը:

ՀՀ-ի անդամակցությունը ԵՏՄ-ին և ԵՄ-ի հետ ստորագրված գործընկերության համաձայնագիրը երկրի զարգացման համար նոր հեռանկարներ, հնարավորություններ է բացում, իսկ կառավարման խորհրդարական համակարգը լավագույն պայմաններ է ստեղծում դրա համար: Այս առումով՝ ես ուզում եմ արժանին մատուցել ՀՀ նախագահ Սերժ Սարգսյանի քաղաքական հեռատեսությանը և պետական գործչի ու կազմակերպչի հմտությանը:  

Հայ ժողովրդի հերոսական անցյալն ու փորձը ցույց են տալիս, որ մեր պատմությունն առավելապես ոգու պատմություն է: Առանց այդ ոգու և հավատի մենք չէինք կարող խոր անցյալից հասնել մինչև մեր օրեր: Մենք եղել ենք արդի համամարդկային արժեքների ակունքներում:  

Ժամանակային ու տարածականության այդ տիրույթներում մենք տարբեր ժողովուրդների հետ համերաշխ համակեցության անգնատահելի փորձ ենք ձեռք բերել ու մեր պատմությամբ ապացուցել, որ արարող, ստեղծագործ, հաշտ ու խաղաղ ժողովուրդ ենք: Ահա թե ինչու Հայաստանը հետևողականորեն առաջ է տանում բոլոր հակամարտությունները  խաղաղ և բանակցային ճանապարհով լուծելու քաղաքականությունը, առաջ է տանում ցեղասպանությունները և մարդկության դեմ գործած այլ հանցագործությունները կանխարգելելու քաղաքականությունը: Այն մեծ ողբերգությունը, որ հայ ժողովուրդը ապրել է 100 տարի առաջ՝ Մեծ եղեռնի տարիներին, զգոնության դաս պետք է լինի բոլորի համար: Ուստի այսօր Ցեղասպանության ճանաչումն ինքնանպատակ չէ, մարդկության դեմ գործած այդ ոճրի` միջազգայնորեն ընդունումն ու դատապարտումը կարևոր քայլ է դրա կրկնությունը որևէ տեղ աշխարհում բացառելու նպատակով:

Մեր առաջնահերթություններից մեկը պետք է լինի Հայաստան-Արցախ-Սփյուռք միասնության համակողմանի ամրապնդումը: Մեր ազգային ամրապնդման գրավականն ու հենարանը եկեղեցին է՝ համաշխարհային ազգային մի կառույց, որի շուրջ դարեր ի վեր համախմբվել է մեր ժողովուրդը: Պետք է անենք ամեն բան արհեստական հակասությունների վերացման և մեր հավաքական ուժի գիտակցման ուղղությամբ:

Հավատ, վստահություն, արդարություն և ամենօրյա բարեխիղճ աշխատանք՝ այս արժեքներն են, որ կարող են խթանել մեր հասարակության ստեղծագործական ուժերն ու եռանդը: Տնտեսության ակտիվացման հստակ տեսլականն ու դրա շոշափելի արդյունքները կարող են ոչ միայն խթանել տնտեսական աճը, այլև արգելակել արտագաղթն ու հայրենիք վերադարձնել շատերին: 

Պետք է ներդրումներ արվեն գիտության, կրթության և մշակույթի ոլորտում: Վստահ եմ, որ մենք ի վիճակի ենք Հայաստանը դարձնել գրավիչ գործընկեր: Վստահեցնում եմ երիտասարդներին, որ ես միշտ լինելու եմ նրանց կողքին: 

Կերտելու ենք նոր Հայաստան, հայրենիք աշխարհի բոլոր հայության համար»: