ԱՄՆ Ներկայացուցիչների պալատի 37 անդամ միացել է Արցախի և Հայաստանի համար 70 միլիոն դոլարի օգնության կոչին

ԱՄՆ Ներկայացուցիչների պալատի 36 անդամ միացել է Կոնգրեսի Հայկական հարցերով հանձնախմբի համանախագահ, Ներկայացուցիչների պալատի անդամ Ֆրենկ Փալոնին՝ կոչ անելով աջակցել Արցախի և Հայաստանի համար 2019 ֆինանսական տարում 70 միլիոն դոլարի օգնության փաթեթին:  Այսպիսով` կոչին միացողների ընդհանուր թիվը կազմել է 37 հոգի:

Հիշեցնենք, որ ԱՄՆ Կոնգրեսի Հայկական հարցերով հանձնախումբը կոչ է արել 2019 ֆինանսական տարում աջակցել Արցախի և Հայաստանի համար 70 միլիոն դոլարի օգնության փաթեթին:

Հայ Դատի հանձնախմբի պաշտոնական կայքէջից տեղեկանում ենք, որ ԱՄՆ Հայ Դատի հանձնախմբի գործադիր տնօրեն Արամ Համբարյանը կառույցի անունից գնահատանք է հայտնել կոնգրեսական Փալոնին, Հայկական հարցերով հանձնախմբի ղեկավարությունում նրա գործընկերներին և բոլոր նրանց, ովքեր միացել են Արցախի և Հայաստանի համար «խաղաղության և բարգավաճման» օգնության փաթեթին աջակցելուն:

Նշենք, որ հանձնախումբը 6 միլիոն դոլար է խնդրել տրամադրել Արցախին՝ ականազերծման և հաշմանդամների օգնության համար, 4 միլիոն դոլար՝ խաղաղության աջակցման համար, ինչպես նաև 30 միլիոն դոլար Հայաստանին՝ որպես տնտեսական օգնություն` 10 միլիոն դոլար՝ որպես ռազմական օգնություն, 20 միլիոն դոլար՝ որպես Միջին Արևելքից փախստականների ընդունման համար օգնություն:

Հանձնախումբը նաև խնդրել է ռազմական օգնություն չտրամադրել Ադրբեջանին: