Ամերիկյան Starz հեռուստաալիքը ապրիլի 23-ին կցուցադրի Հայոց ցեղասպանության մասին ֆիլմը

Հայոց ցեղասպանության մասին բեմադրիչ Ջո Բեռլինգրի հեղինակած «Քանդելու մտադրություն. մահ, ուրացում և ներկայացում» ֆիլմն ապրիլի 23-ին կցուցադրվի Starz հեռուստաալիքով:

Ըստ Asbarez-ի՝ հեռուստաալիքի տնօրինությունը որոշում է կայացրել ֆիլմն առաջին անգամ ցուցադրել ապրիլի 23-ին, որից հետո ֆիլմի ցուցադրությունը կկրի պարբերական բնույթ:

Անցած տարի նկարահանված ֆիլմը ցուցադրվել է Նյու Յորքում, Լոս Անջելեսում, Բոստոնում և Սան Ֆրանցիսկոյում: Ահբ ծնունդ է առել Հայոց ցեղասպանության մասին «Խոստումը» ֆիլմի պատրաստման օրերին: Բեռլինգրը դրա նկարահանման համար զրուցել է մի շարք մտավորականների, պատմաբանների և արվեստագետների հետ: