Դավիթ Հարությունյանը բացատրեց, թե ինչու են կառավարության նիստերը դռնփակ լինելու

Կառավարության նիստից հետո արդարադատության նախարար Դավիթ Հարությունյանն անդրադարձավ լրագրողների հարցերին, որոնք վերաբերում էին ապագա վարչապետի մշտական նստավայրին: Նշենք, որ ապագա վարչապետի նստավայրը լինելու է Բաղրամյան 26-ի` ներկայիս նախագահական նստավայրի շենքը:

Նախարարն առաջարկեց չդիտարկել անունները, ըստ նրա` ենթադրենք, թե Սերժ Սարգսյանը հրաժարվում է վարչապետ դառնալուց, այդ դեպքում ապագա վարչապետը, ով էլ լինի, աշխատելու է Բաղրամյան 26-ում, քանի որ այդ շենքը հարմարեցված է բոլոր այն գործառույթներին, որոնք անհրաժեշտ են լինելու գործադիր իշխանության ղեկավարին:

Նա անդրադարձավ աղմկահարույց այն սահմանմանը, որ ապագա կառավարության նիստերը լինելու են դռնփակ: «Բոլոր երկրներում կառավարություններն իրենց նիստերը դռնփակ են անցկացնում, ինչը հնարավորություն է տալիս ավելի անկեղծ ու ավելի քննադատական հայացք ուղղել կառավարության մյուս անդամների առաջարկություններին: Նախ` մենք բացառություն ենք, որ կառավարության նիստերը դռնբաց են, բացառություն ենք, որ կառավարության նիստերին մասնակցում են այլ անձինք, ովքեր կառավարության անդամներ չեն, և այդ ամենը հանգեցրել է իր բացասական հետևանքներին: Ահա, թե ինչու իրական քննարկումները ծավալվում են ոչ թե կառավարության նիստերում, այլ նիստերից առաջ կամ հետո, ինչը նորմալ երևույթ չէ»,- ասաց Հարությունյանը:

Նա ուսումնասիրել է այլ երկրների փորձը և նկատել, որ գործնականում չկան երկրներ, որոնք կառավարության նիստերը ուղիղ հեռարձակում են, բայց դա չի էլ նշանակում, որ կառավարության նիստերը չպետք է լինեն թափանցիկ, և օրենքով ամրագրվել է, որ վարչապետը պարտավոր է հանրությանը ներկայացնել կառավարության գործունեությունն ու որոշումները:

«Դուք կհարցնեք` լրագրողնե՞րն են խանգարում, ես կասեմ` ոչ միայն լրագրողները, այլ ցանկացած` կառավարության անդամ չհանդիսացող անձինք, ովքեր սահմանափակում են ցանկացած քննարկում: Եթե ընտանիքում դուք վիճեք ձեր տիկնոջ հետ, դա մի բան է, բայց երբ այդ վեճին ներկա լինի երրորդ անձ, ձեր բանավեճը կստանա այլ երանգ: Կառավարությունը պետք է գործի անկաշկանդ»,- ասաց նախարարը: