Կարևոր հարցերի վերաբերյալ բրիֆինգներ կլինեն. Դավիթ Հարությունյանը` կառավարության դռնփակ նիստերի մասին

Այսօր` կառավարության նիստից հետո, լրագրողների հետ ճեպազրույցում արդարդատության նախարար Դավիթ Հարությունյանը անդրադարձավ հաջորդ կառավարության կողմից նիստերը դռնփակ անցկացնելու որոշմանը:

«Այո, գոհ եմ այդ որոշումից: Որևէ քայլ կատարելիս ես գիտակցում եմ, որ կարող եմ արժանանալ քննադատությունների: Այնուամենայնիվ, փորձում եմ անել այն, ինչ, իմ կարծիքով, կօգնի, որ քննարկումները լինեն ավելի խոր, բովանդակալից և արդյունավետ»,- ասաց նախարարը:

Իսկ թե ինչպես է պատկերացնում լրագրողների աշխատանքը կառավարության դռնփակ նիստերի դեպքում, Դավիթ Հարությունյանը նշեց, որ ավանդույթը` իջնել լրագրողների մոտ ու ներկայացնել կարևորագույն հարցերի պատասխանները, կդառնա էլ ավելի կարգավորված: Օրակարգը լինելու է բաց:

«Կառավարության ամեն նիստից հետո նախարարները կորոշեն, թե որ հարցերն են, որ առավել կարևոր են ու հանրային հետաքրքրություն են ներկայացնում, և կիջնեն ու կպատասխանեն լրագրողների հարցերին: Կառավարությունը ղեկավարվելու է լրագրողների հավատագրման կարգով, ինչպես նախկինում էր: Կարևոր հարցերի վերաբերյալ բրիֆինգներ կլինեն»,- ասաց նախարարը: