Ինչո՞ւ է ՀՀԿ-ն ցանկանում գազի հարցով ժամանակավոր հանձնաժողովի նիստերը դռնփակ անցկացնել

ԱԺ նիստում, երբ ՀՀԿ խմբակցության պատգամավոր Դավիթ Հարությունյանը ներկայացնում էր գազամատակարարման ոլորտում տարբեր խնդիրների պատասխանը ստանալու համար ժամանակավոր հանձնաժողով ստեղծելու նախագիծը, ԱԺ պատգամավոր Խաչատուր Քոքոբելյանը հարց ուղղեց Դավիթ Հարությունյանին, թե ինչո՞ւ է հանձնաժողովի նիստերը առաջարկվում անցկացնել դռնփակ: «Զուտ ժողովրդավարության առումով` պետք է հանձնաժողովի նիստերը բաց ու հրապարակային անցկացվեն: Դա նաև զերծ կպահի քաղաքական շահարկումներից»,- ասաց Խաչատուր Քոքոբելյանը:

Դավիթ Հարությունյանը նշեց. «Ոչ վատ առումով, միայն պոզիտիվ առումով եմ ասում, բայց յուրաքանչյուր պատգամավոր որոշակի առումով շոումեն է: Դա բնորոշ է, առհասարակ, յուրաքանչյուր պաշտոնյայի ու քաղաքական գործչի: Բայց այս հարցում դա կարող է խանգարել, երբ, ասենք, տեսախցիկ է միացված: Դա ուղղակիորեն կարող է խանգարել բովանդակային աշխատանքին, այնինչ մեզ սպասվում է բովանդակային լայնածավալ աշխատանք»,- ասաց Դավիթ Հարությունյանը:

Խաչատուր Քոքոբելյանը, ի պատասխան, նշեց, որ Դավիթ Հարությունյանի բացատրությունները համոզիչ չէին, որովհետև հասարակությունը կարողանում է տարբերել, թե որ պատգամավորն ու քաղաքական գործիչն է զբաղված շոուով, ուստի գազամատակարարման ոլորտի խնդիրների ուսումնասիրությունը պետք է քննարկվի հրապարակային: