Շարմազանովի մեղմ մեկնաբանությունը Ծառուկյանի հայտարարության կապակցությամբ

Տոկոսային հարաբերակցության մեջ դուք պիտի ասեք՝ ԱԺ նիստերը լուսաբանող լրագրողներդ, ես ինձ գնահատական չեմ տալիս. Խորհրդարանում լրագրողների հետ զրույցում ասաց ԱԺ փոխնախագահ, ՀՀԿ խոսնակ Էդուարդ Շարմազանովը՝ անդրադառնալով հարցին` արդյո՞ք ինքն իրեն դասում է այն պատգամավորների շարքը, ովքեր գալիս են, ներկա ստանում, շուտ հեռանում նիստերից:

Հիշեցնենք, որ այսօր «Ծառուկյան» խմբակցության ղեկավար Գագիկ Ծառուկյանն ասել էր, որ պատգամավորների 90 տոկոսը գալիս է ԱԺ, ներկա ստանում, վազելով հեռանում, խորհրդարանն էլ դատարկվում է:

«Ազգային ժողովի մի մասն աշխատում է նիստերում, մյուսը՝ հանձնաժողովներում, մնացածը՝ մարզերում: Պատգամավորների աշխատանքի գնահատականը ընտրողները պետք է տան ընտրությունների ժամանակ»,- նշեց Շարմազանովը:

Դիտարկմանը` Ծառուկյանը նաև ասել էր, որ ինքը ևս աշխատում է, բայց ներկա չէ նիստերին, տեսե՞լ է Ծառուկյանի ձեռագիրը խորհրդարանում, Շարմազանովն արձագանքեց. «Ձեզ համար մեծ է գայթակղությունը, որ ես պարոն Ծառուկյանի հայտարարությունը մեկնաբանեմ։ Բայց ես չեմ մեկնաբանում։ Պարոն Ծառուկյանը երկրորդ քաղաքական ուժի ղեկավարն է, և նրանք իրենց թիմով որոշում են՝ ինչպիսի քաղաքական օրակարգով առաջնորդվեն»։

Դիտարկմանն էլ` ջերմ վերաբերմունք կա Ծառուկյանի նկատմամբ, Շարմազանովը պատասխանեց. «Ես իմ բոլոր գործընկերների նկատմամբ ունեմ ջերմ վերաբերմունք»:

Լրագրողները հետաքրքրվեցին՝ գուցե կաշկանդո՞ւմ է իշխող ուժը երկրորդ ուժին: ԱԺ փոխխոսնակը պատասխանեց. «ՀՀԿ-ն շատ ժողովրդավար ուժ է, որևէ մեկին որևէ բանով չի կաշկանդում»: