Հստակեցնել արտահանվող և ներմուծվող սննդամթերքի փորձաքննության կարգը. հանձնարարական

Այսօր կառավարության նիստում վարչապետ Կարեն Կարապետյանը արտահանվող և ներմուծվող սննդամթերքի փորձաքննության կարգի հստակեցման վերաբերյալ հանձնարարական տվեց Սննդի անվտանգության պետական ծառայության պետին և տնտեսական զարգացման և ներդրումների նախարարին:
Նրա խոսքով`  սննդամթերքի անվտանգության ոլորտում իրականացվող վարչարարության շահառուների զգալի զանգվածը գործարար միջավայրի մարդիկ են, ուստի անհրաժեշտ է, որ արտահանվող կամ ներմուծվող ապրանքների թույլտվության տրամադրումը, փորձաքննության ներկայացվող պահանջներն ու կարգը  լինեն հստակ և կանխատեսելի: Ներկայումս սահմանված որոշումներով սննդամթերքի փորձաքննության անցկացման կարգերում միջազգային նորմերն ամբողջությամբ չեն տեղայնացվել:

«Հանձնարարում եմ Սննդի անվտանգության պետական ծառայության պետին և տնտեսական զարգացման և ներդրումների նախարարին մինչև տարվա վերջ համատեղ մշակել և կառավարության աշխատակազմ ներկայացնել սննդամթերքի արտահանման և ներմուծման դեպքերում պահանջվող փաստաթղթերի, փորձաքննության կարգերի հստակեցման, միջազգային նորմերի տեղայնացման վերաբերյալ կառավարության մի շարք որոշումներում փոփոխություններ կատարելու վերաբերյալ առաջարկություններ»,-ասաց վարչապետը: