Լավրովի հայտարարությունների նպատակը Հայաստանի հասարակությանը հանգստացնելն էր. Սաֆրաստյան

Ռուսաստանի կողմից Արցախի հարցում որևիցե զիջում չի լինի. լրագրողների հետ զրույցում կարծիք հայտնեց ՀՀ ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը:

«Ռուսաստանը, Արցախի հարցում լինելով միջնորդ, Մինսկի խմբի համանախագահողներից մեկը, պարզապես ապահովում է հարթակ բանակցային գործընթացի համար»,- ասաց նա:

Սաֆրաստյանի կարծիքով` Ռուսաստանի շահերից բացարձակապես չի բխում, որ զիջումների գնա Արցախյան հիմնահարցի կարգավորման գործընթացում:  «Ռուսաստանը Հարավային Կովկասն ընկալում է որպես իր ազդեցության ոլորտ, և Հայաստանը այստեղ շատ կարևոր նշանակություն ունի Ռուսաստանի համար, ուստի Ռուսաստանը չի գնա այնպիսի քայլի, որը կվնասի, հարցականի տակ կդնի Հայաստանի դաշնակցային դիրքորոշումն իր նկատմամբ»,- հայտարարեց նա:

Իր այս կարծիքը Սաֆրաստյանը հիմնավորեց ՌԴ ԱԳՆ ղեկավար Սերգեյ Լավրովի` Հայաստանում արած այն հայտարարություններով, որ Արցախյան հիմնահարցի կարգավորման համար երկար ժամանակ է պետք, և որ ճիշտը հարցի` փաթեթային տարբերակով  լուծումն է:

«Ռուսական դիվանագիտությունը հաշվի է առնում այն հանգամանքը, որ Հայաստանում անհանգստություն կա Ռուսաստանի դիրքորոշման կապակցությամբ Արցախյան հիմնահարցի կարգավորման գործընթացում: Լավրովի  հայտարարությունները նպատակ ունեին հանգստացնելու հասարակական կարծիքը Հայաստանում»,- ընդգծեց Սաֆրաստյանը: