Հայաստանը ոչ ոքի չի սպառնում և ապահովում է իր անվտանգությունը. Սերժ Սարգսյան

Հայաստանի զինված ուժերը բավականին լավ ապահովված են` տեխնիկական առումով, իրենց տրամադրության տակ ունեն ժամանակակից սպառազինություն, սակայն դա չի նշանակում, որ չպետք է զարգանան` և' զորքերի կառավարման, և' արդիականացման առումով: Այդ մասին Россия-24-ին տված հարցազրույցում ասել է ՀՀ նախագահ Սերժ Սարգսյանը:

Նախագահի խոսքով` հենց արդիականացման նպատակով էլ Հայաստանը խնդրել է ռուսական կողմին` ժամանակակից սպառազինություն ձեռք բերելու համար վարկ տրամադրել:

«Հայաստանը ոչ ոքի չի սպառնում և ապահովում է իր անվտանգությունը: Հայաստանի ԶՈՒ-ն երկրի անվտանգության առաջին երաշխավորն է: Սակայն ժամանակակից աշխարհում ոչ մի երկիր ունակ չէ միայնակ ապահովել իր անվտանգությունը:  Այդ իսկ պատճառով երկրները դառնում են միության անդամներ: Եվ ահա մենք ՀԱՊԿ-ի անդամ ենք և մշակում ենք կոլեկտիվ պաշտպանության հարցեր»,- ասել է Սարգսյանը: