Միացյալ խմբավորումը ապրիլյան պատերազմին անմիջական արձագանքողի դիրքում չէր կարող լինել. Կորյուն Նահապետյան

Խորհրդարանում Հայաստանի Հանրապետության եւ Ռուսաստանի Դաշնության միջեւ ստորագրված «Հայաստանի Հանրապետության զինված ուժերի եւ Ռուսաստանի Դաշնության զինված ուժերի զորքերի (ուժերի) միացյալ խմբավորման մասին» համաձայնագիրը վավերացնելու մասին հարցի քննարկման ժամանակ հարակից զեկուցող` ԱԺ պատգամավոր Կորյուն Նահապետյանին հարցեր ուղղեց «Ելք» խմբակցության պատգամավոր Արտակ Զեյնալյանը: Նա մտահոգություն հայտնեց, որ միացյալ զինված ուժերի վերաբերյալ այդ համաձայնագիրը իրավական ակտ է, որը չի կարող նորմատիվ չլինել: «Իրավական ակտ է ընդունվել, այսպես ասած` գաղտնի գրիֆով»,- ասաց Զեյնալյանը, ապա հավելեց, որ իրավական հետևանքներ, պատասխանատվություններ ենթադրող իրավական ակտ է ընդունվել, և դա կատարվել է գաղտնի` գաղտնի է ստորագրվել:

Նա նաև հարց բարձրացրեց` ապրիլյան պատերազմի ժամանակ ինչո՞ւ արագ չի արձագանքել այդ միացյալ զորախումբը: Զեյնալյանը նաև նշեց. «Խոսվեց, թե շրջանառության մեջ է դրվել ներքին սպառնալիքի մասին հարցը, բայց մենք վավերացնում ենք մի պայմանագիր, որն ավելի բարձր իրավաբանական ուժ է ունենալու»:

Կորյուն Նահապետյանը նախ նշեց, որ ներպետական որևէ օրենքով սահմանված չէ «ներքին սպառնալիք» հասկացությունը, և որ ինքն ասել է, որ ՀԱՊԿ շրջանակներում կան փաստաթղթեր, որոնցում տրված է այդ հասկացության սահմանումը:

«Ինչ վերաբերում է իրավական ակտին, որն ընդունվել է 97-98 թվականներին, այդ հարցն ինձ էլ է մտահոգում: Կարծում եմ` այդ հարցը պետք է բարձրացնել այն անձանց առջև, որ այդ ժամանակ նման գաղտնի բան են արել, բայց այդ ժամանակ իրավական ակտերի մասին օրենքն ընդունված չի եղել, որին դուք հղում արեցիք»,- ասաց Նահապետյանը:

Անդրադառնալով պատգամավորի` ապրիլյան պատերազմի մասին արված հարցադրմանը, նա ասաց. «Այդ խմբավորումը հստակ ունի իր խնդիրները, այդ մասով ինքն անմիջականորեն արձագանքողի դիրքում չպետք է լինի: Զինված խմբավորումը գործում է այն մանդատի շրջանակներում, ինչի համար ինքը նախատեսված է: Սա մենք պետք է հասկանանք»: