2023 թվականին Արցախում աշակերտների թիվը կավելանա 25 հազարով. Արայիկ Հարությունյան

Այսօր հրավիրված ասուլիսում Արցախի պետնախարար Արայիկ Հարությունյանից լրագրողները հարցրեցին Արցախի ժողովրդագրության ցուցանիշների մասին: Հարությունյանի խոսքով` 2007 թվականին Արցախում մշտական  բնակչության թիվը եղել է 138 հազար, իսկ 2016 թվականին` 146 հազար:

«Ինչքանո՞վ է սա բավարար, բավարար չէ, մենք ավելի մեծ տեմպեր ենք պլանավորում և ցանկանում»,- ասաց նա:

Պետնախարարի խոսքով` ծնելիության խթանման ծրագիրն իր ազդեցությունը թողել է և տարեկան միջին 2000 ծնունդը դարձել է 2500:

«2017 սեպտեմբերի 1-ին աշակերտների  թիվը, համեմատած 2016 թվականի սեպտեմբերի 1-ի հետ, ավելացել է մոտ 450-ով»,- հայտնեց նա, ապա նշեց, որ ծնելիության ազդեցությունը աշակերտների թվի վրա պետք կլինի 17 տարի: «Ուստի 2023 թվականին աշակերտների թիվը կավելանա 25 հազարով»,- ասաց Հարությունյանը: