Դատավոր Մեսրոպ Մակյանին գործուղել են Էրեբունու դատարան

ՀՀ դատարանների նախագահների խորհրդի նախագահ Արման Մկրտումյանի որոշմամբ` Շիրակի մարզի ընդհանուր իրավասության առաջին ատյանի դատարանի դատավոր Արտակ Թադևոսյանը և Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մեսրոպ Մակյանն այսօրվանից վեց ամիս ժամկետով գործուղվել են Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարան: Այս մասին տեղեկանում ենք ՀՀ դատարանների նախագահների խորհրդի որոշումից:

Նման որոշումը պայմանավորված է Էրեբունի և Նուբարաշեն վարչական շրջանների ընդհանուր իրավասության դատարանում քրեական մասնագիտացում ունեցող դատավորների թվի պակասով:

Նշենք, որ դեռևս օգոստոսին Էրեբունի և Նուբարաշեն վարչական շրջանների դատարանի դատավորներից Արտուշ Գաբրիելյանի անուն- ազգանունը վեց ամսով հանվել էր գործերի բաշխման ցանկից` հաշվի առնելով նրա վարույթում առանձնակի բարդության գործերի առկայությունը (խմբ. խոսքը՝ «Սասնա ծռերի» երկու գործերի մասին է):