Լավ եմ արել եկել եմ, ձեր ի՞նչ գործ. քաղաքապետարանի աշխատակիցը՝ լրագրողներին

Այսօր առավոտից քաղաքապետարանի մի խումբ աշխատակիցներ գտնվում են «Ֆիրդուս» տոնավաճառում՝ թույլ չտալով առևտրականներին բացել իրենց տաղավարներն ու առևտուր իրականացնել: Ուշագրավ է, որ սկզբում նրանք պնդում էին, որ քաղաքապետարանի աշխատակիցներ չեն, սակայն առևտրականները «մատնեցին» նրանց: Բազմաթիվ հարցադրումներին ի պատասխան՝ քաղաքապետարանի առևտրի բաժնի աշխատակից ներկայացած անձը լրագրողներին հորդորեց դիմել քաղաքապետարանի լրատվության բաժնին:

Հարցին, թե ի՞նչ գործառույթ է իրականացնում տոնավաճառում՝ աշխատակիցն ասաց. «Լավ եմ արել եկել եմ, ձեր ինչ գործ»:

Ավելի վաղ հայտնել ենք, որ այսօր վաղ առավոտյան քաղաքապետարանի աշխատակիցները տեխնիկա են բերել և փորձել ապամոնտաժել «Ֆիրդուս» տոնավաճառը, սակայն տարածքի բնակիչներն ու առևտրականները թույլ չեն տվել: Նշենք, որ կառավարության որոշմամբ՝ տարածքը հանրային գերակա շահ է ճանաչվել դեռ 2007-ին։

Քաղաքապետն այս տարվա հունիսին հայտարարել էր, որ ներդրողը սկսելու է շինարարական աշխատանքները, և ոլորտի պատասխանատուներին հանձնարարել էր բանակցություններ սկսել տեղի առևտրականների հետ՝ նրանց այլ վայրեր տեղափոխելու համար։ Հունիսի 19-ին, Երեւանի քաղաքապետարանում տեղի ունեցած աշխատանքային խորհրդակցության ժամանակ զեկուցվել էր, որ հունիսի 19-20-ը Ֆիրդուսի տոնավաճառի առեւտրականներին կտեղափոխվեն այլ տոնավաճառներ:

Մանրամասները՝ Yerkir.am-ի տեսանյութում: