Հանձնարարական թվային օրակարգի ձևավորման վերաբերյալ

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը հանձնարարական տվեց թվային օրակարգի մշակման և իրագործման վերաբերյալ: Կառավարության հնգամյա ծրագրով սահմանված են թվային օրակարգից բխող մի շարք համալիր միջոցառումներ` հստակ ժամկետներով, այդ թվում` պետական և մասնավոր հատվածների համագործակցությամբ թվային ռազմավարության և գործողությունների ծրագրի ընդունումը:

Թվային օրակարգի շրջանակներում արդեն իսկ ձևավորվել է թվային զարգացման աջակցման խորհուրդ, մշակման փուլում է միասնական թվայնացված միջավայրի իրականացման ծրագիրը:

«Հաշվի առնելով լավագույն միջազգային փորձը` պետք է նշել, որ ժամանակակից թվային օրակարգի իրագործումը պահանջում է միասնական, մասնագիտացված և համակարգված մոտեցումներ: Հանձնարարում եմ կառավարության աշխատակազմի ղեկավարին` 15-օրյա ժամկետում ներկայացնել առաջարկությունների փաթեթ պետական կառավարման և ՏԻՄ էլեկտրոնային համակարգերի զարգացման քաղաքականության համակարգման և մասնագիտացված օղակի ձևավորման վերաբերյալ»,- ասաց վարչապետը:

Նրա խոսքով` պետք է թվային օրակարգի վերաբերյալ ստեղծվի մեկ կենտրոն, որը կկանոնակարգի քաղաքականությունը: