ՌԴ այցի ընթացքում ձեռք բերված պայմանավորվածությունների վերաբերյալ հանձնարարական տրվեց

Կառավարության նիստում օրակարգին անցնելուց առաջ վարչապետ Կարեն Կարապետյանը հանձնարարական տվեց, որը վերաբերում էր նրա՝ ՌԴ կատարած պաշտոնական այցին և ուղղված էր ՀՀ տնտեսական զարգացման և ներդրումների նախարարին:

Մասնավորապես հանձնարարվեց ՌԴ կատարած պաշտոնական այցի ընթացքում ձեռք բերված պայմանավորվածությունները կատարելու նպատակով ակտիվ աշխատանքներ իրականացնել ՌԴ համապատասխան գերատեսչությունների հետ հայ-ռուսական ներդրումային հիմնադրամի մեկնարկն ապահովելու ուղղությամբ, կատարված աշխատանքների վերաբերյալ ներկայացնել հաշվետվություն:

Մեղրիի տարածքում ստեղծվելիք ազատ տնտեսական գոտում ռուսական կապիտալի ներգրավվածությունը ապահովելու նպատակով հանձնարարվեց ՌԴ համապատասխան գերատեսչությունների և շահագրգիռ մարմինների հետ ապահովել անհրաժեշտ աշխատանքներ և ընթացքի վերաբերյալ ներկայացնել ամենամսյա հաշվետվություն:

«Ի միջի այլոց, ազատ տնտեսական գոտու մեկնարկի մասին հայտարարե՞լ եք»,- հարցրեց վարչապետը նախարար Սուրեն Կարայանին:

Նախարարը պատասխանեց, որ անցյալ շաբաթ հայտարարել են դրա մասին, հիմա սպասում են, որ մասնակցության հայտեր ներկայացնեն:

Հանձնարարվեց նաև Երևանի քաղաքապետարանին, նախարարություններին և համապատասխան այլ մարմինների` համատեղ քննարկել 2017թ. ընթացքում օտարերկրյա ներդրումային միջավայրի բարելավման գործողությունները` հատկապես ուշադրություն դարձնելով Համաշխարհային բանկի համապատասխան զեկույցի վրա, մշակել անհրաժեշտ տեղեկատվության վերաբերյալ առաջարկություններ` նպատակ ունենալով էապես բարելավել ու պարզեցնել վարչարարական ներկա ընթացակարգը և մինչև փետրվարի վերջը առաջարկություններ ներկայացնել ՀՀ կառավարության աշխատակազմ: