Ես երջանիկ եմ, որ կառավարությունը ղեկավարում է իմ շատ վաղեմի ընկերը. Վիգեն Սարգսյան

ՀՀ պաշտպանության նախարար Վիգեն Սարգսյանը շատ երջանիկ է, որ այսօր երկրի կառավարությունը ղեկավարում է փորձառու, արդյունավետ կառավարիչ, իր շատ վաղեմի ընկեր Կարեն Կարապետյանը: «Նրան ես որևէ ձևով չեմ կարող տարանջատել մեր ամբողջ թիմից»,- ՊՆ-ում լրագրողների հետ հանդիպման ժամանակ ասաց նա` պատասխանելով հարցին, թե ցանկություն ունի՞ 2018-ին ՀՀ վարչապետ լինելու:

«Ես էլի եմ ասել և հիմա էլ ասում եմ, որ ես ցանկություն ունեմ պաշտպանության նախարարությունում իմ սկսած աշխատանքը հասցնելու այն փուլին, որն ինձ թույլ կտա ասել, որ մենք այս ոլորտում ռեալ բաներ ենք փոխել: Դա կլինի իմ ամենամեծ պատիվը` որպես ՀՀ քաղաքացու և որպես հայ մարդու, դա ինձ համար մեծ երջանկություն կլինի»,- ասաց նախարարը:

Վիգեն Սարգսյանը հավաստիացրեց, որ իրենց քաղաքական թիմն ամուր է: «Մեր թիմն ամուր է ինչպես երբեք, և որոշումներն ի վիճակի ենք կայացնել շատ հետևողական. երբ այդ որոշումների ժամը գալիս է, դրանք համաչափ ձևով հանրայնացվում են: Մենք լավ թիմով ենք եկել այս ընտրությունների արդյունքում և ձևավորել գործադիր իշխանություն»,- ասաց նա՝ ընդգծելով, որ իրենց թիմի յուրաքանչյուր անդամի հաջողություն կարևոր է իրենց համար: