«Խոշորացման արդյունքում ավելի թափանցիկ կլինի ավագանիների գործունեությունը»

ՀՀ տարածքային կառավարման և զարգացման նախարարության տեղական ինքնակառավարման վարչության պետ Աշոտ Գիլոյանը Հայաստանում վարչատարածքային բարեփոխումների վերաբերյալ պարզաբանումներ է ներկայացրել հունիսի 12-ին լրագրողների համար կազմակերպված սեմինարում: Երևանի մամուլի ակումբի կողմից «ՀաՄաՏեղ»  ծրագրի շրջանակում կազմակերպված սեմինարի ընթացքում Աշոտ Գիլոյանը կարևորել է նմանատիպ հանդիպումները՝ վարչատարածքային բարեփոխումները հանրությանը ներկայացնելու համար:

«Խոշորացման արդյունքում ավելի վերահսկելի, ավելի թափանցիկ  կլինի ավագանիների գործունեությունը, բյուջեն ավելի տեսանելի  կլինի: Սա հնարավորություն է   բարձրացնելու  տեղական ինքնակառավարման մարմինների  աշխատանքի արդյունավետությունն ու թափանցիկությունը, և ուղղված է  ՏԻՄ-երի կարողությունների զարգացմանը»,-ասել է Ա. Գիլոյանը:

ՀՀ ՏԿԶՆ ներկայացուցիչը մանրամասնել է նախորդ շաբաթ խորհրդարանում ընդունված վարչատարածքային բարեփոխումների վերաբերյալ օրենքը, ներկայացրել է արդեն խոշորացված 18 համայնքներում իրականացված ծրագրերը, ձեռքբերումները, ինչպես նաև պատասխանել  է լրագրողներին հետաքրքրող հարցերին:

ՀՀ տարածքային կառավարման և զարգացման նախարարություն