Պետական վերահսկողությունն ավելի թափանցիկ կլինի

Վերահսկիչ պալատի կողմից տարբեր պետական մարմիններում անցկացված վերահսկողության արդյունքները եւ բացահայտված խնդիրների լուծմանն ուղղված` համապատասխան մարմինների կողմից ձեռնարկված միջոցառումների վերաբերյալ տեղեկատվությունն արդեն տեղադրվելու է էլեկտրոնային կառավարման www.e-gov.am կայքում. Նորամուծությունն այսօր լրագրողներին ներկայացրեց կառավարության աշխատակազմի ղեկավար, նախարար Դավիթ Սարգսյանը:

Այս նախաձեռնությամբ կառավարությունը ցանկանում է բարձրացնել պետական տարբեր մարմինների գործունեության թափանցիկությունը: Կառավարությունը հույս ունի վերացնել նախկինում հնչած մտահոգությունները, ըստ որոնց` երբ Վերահսկիչ պալատը վերահսկողություն էր իրականացնում եւ եզրակացություն տալիս պետական կառավարման մարմիններին, այնուհետեւ դժվար էր լինում գտնել պատասխանը, թե դրանից հետո ինչ է լինում` ինչ հետեւանքներ են եղել, ինչ վնասներ են վերականգնվել եւ այլն: