Քայլ առ քայլ ընտրությունները կատարվում են ավելի թափանցիկ ու ավելի օրինական. Հերմինե Նաղդալյան

Այսօր լրագրողների հետ զրույցում ԱԺ նախագահի տեղակալ, ՀՀԿ-ական Հերմինե Նաղդալյանը խոսեց սահմանադրական հանրաքվեի մասին:

Նրա խոսքով՝  ընտրակեղծիքների և ընտրախախտումների մասին հայտարարությունները պիտի լինեն հստակ, առարկայական, այսինքն՝ փաստարկված: Ըստ Նաղդալյանի` խախտումների մասին զրույցներն իներցիոն են, իսկ որոշ քաղաքական ուժեր հիշողություններ ու պատրանքներ ունեն:

«Եթե չեմ սխալվում, ԿԸՀ-ին ներկայացվել է ընտրախախտումների մասին 78 բողոք՝ վերահաշվարկներ կատարելու մասին, որոնցից 19-ը երեկ վերահաշվարկվել են, ու արդյունքում պարզ է դարձել, որ էական տարբերություն չի եղել: Աշխատանքը շարունակվում է, մնացածը ևս վերահաշվարկվելու է, ու նոր դրանից հետո կերևա՝ նման կարծիքների համար հիմքեր կա՞ն, թե՞ ոչ: Մենք որևէ մեկին համոզելու խնդիր չունենք: Իրողությունն այն է, որ քայլ առ քայլ ընտրությունները կատարվում են ավելի թափանցիկ ու ավելի օրինական: Տեսեք, տարիների ընթացքում այն խախտումների տեսակները, որոնք եղել են 10-15 տարի առաջ, անցել են ընտրության գիրկը, օրինակ՝ տեղամասում լույսերը հանգցնելը, տուփերը գողանալը, ընտրատեղամասերի մոտ ամբողջ գիշերը աղմկելը և այլն »,- շեշտեց Նաղդալյանը:

Ըստ նրա՝ ընտրությունների առումով` Հայաստանում արձանագրված է ռեալ առաջադիմություն: «Երբեմնի աժիոտաժը, փողոցների դրամատիզմը, այլևս չկա, այս ամենը մենք հաղթահարում ենք: Կան, մնացել են դեպքեր, որոնք արվում են, բայց դուք էլ լավ գիտեք, որ բարձրաձայնվում է, ստանում են պատասխան»,- հավելեց Նաղդալյանը: