Ոստիկանապետի հանձնարարականով` ծառայողական քննություն է նշանակվել «Ելք» դաշինքի հրապարակած ցուցակի հիման վրա

Հայտնել էինք, որ, ըստ Նիկոլ Փաշինյանի, Տարոն Մարգարյանի` Կոմիտասի 56 հասցեում գտնվող շտաբում գումար են բաժանել, և որ «ՍԱՍ» սուպերմարկետի ներքին ինկասացիայի աշխատակիցներն այդ նախընտրական շտաբ գումար են տարել:

Yerkir.am-ին ոստիկանությունից հայտնեցին, որ, ՀՀ ոստիկանապետ Վլադիմիր Գասպարյանի հանձնարարականով, նշանակվել է ծառայողական քննություն` կապված ԱԺ պատգամավոր, Երևանի ավագանու ընտրություններում «Ելք» դաշինքի քաղաքապետի թեկնածու Նիկոլ Փաշինյանի կողմից հրապարակված ցուցակի հիման վրա:

Նշենք, որ «Ելք» դաշինքից քաղաքապետի թեկնածու Նիկոլ Փաշինյանն իր ֆեյսբուքյան էջում տեսանյութ է տեղադրել, որում, ձեռնոցներ հագած, կարդում է Տարոն Մարգարյանի նշված շտաբից հայտնաբերված ցուցակները, որոնցում մանրամասն գրված է՝ որտեղ եւ ինչպես է հարկավոր ընտրողներին փոխանցել գումարը, ինչպես նաև հրապարակում է մի ցուցակ, որում ոստիկանության ՊՊԾ գնդի աշխատակիցների անուններն են, նաև` ով ինչքան ձայն պետք է բերի ՀՀԿ-ի համար: