ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Ծառայողական քննություն է նշանակվել

«ՉԻ»-ի հունվարի 20-ի համարում` «Կովալի գերդաստանն էլի ակտիվացել է» վերնագրի ներքո տեղեկացրել էինք, որ Կոտայքի մարզպետ Կովալենկո Շահգալդյանի որդին` կիրակի  օրը Չարենցավանում քաղաքապետ վերընտրված Հակոբ Շահգալդյանը, հունվարի 16-ին, երբ ընկերների հետ պարզել է, որ տաքսու վարորդ Սերժիկն ասել է, թե չի ընտրելու Հակոբին, ծեծել է նրան: Գիշերվա ժամը 12-ին քաղաքի կայարանամերձ հրապարակում Հակոբն ու ընկերները բացի այն, որ ծեծի են ենթարկել վարորդին նաեւ վերջինիս ուղղությամբ մի քանի անգամ կրակել են, նոր` հեռացել:

«Երբ հաջորդ օրը վարորդի տղան մոտեցել է քաղաքապետին եւ փորձել բացատրություն պահանջել, քաղաքապետն ասել է, թե իր ընկերները ներողություն են խնդրում վարորդից: Գիշերային ժամին կրակոցները լսել են նաեւ կայարանամերձ հրապարակի հարակից շենքի բնակիչները: Ոստիկանությունն այդ մասին տեղյակ է թե` ոչ, մեծ հարցական է»,- տեղեկացրել էր «ՉԻ»-ն: