Երևանցիների 72,3%-ը կքվեարկի Տարոն Մարգարյանի օգտին. Gallup

Gallup International Association-ի` Հայաստանում լիիրավ անդամ «Էմ Փի Զի» ՍՊԸ-ի տնօրեն Արամ Նավասարդյանն այսօր լրագրողներին ներկայացրեց, թե Երևանի ավագանու ընտրություններին մասնակից քաղաքական ուժերը և նրանց քաղաքապետի թեկնածուներն ինչ վարկանիշ ունեն: Հարցումները ներառում են քարոզարշավի սկզբից մինչև մայիսի 9-ն ընկած ժամկետը:

Նավասարդյանը նշեց, որ հետազոտության մեթոդը դեմ առ դեմ հարցումն է եղել, հարցումն իրականացվել է 1074 անձի շրջանում, Երևան քաղաքի 12 վարչական շրջաններում, իսկ սխալվելու հավանականությունը 3% է:

Հարցին՝  տեղյա՞կ եք, որ մայիսի 14-ին ընտրություններ են, հարցվածների 95,9 տոկոսը պատասխանել է՝ այո: Հարցվածների 56,1 տոկոսն էլ նշել է, որ հետևում է քաղաքական ուժերի քարոզարշավին: Իսկ թե ո՞ր ուժերի քարոզարշավին են հանդիպել ավելի շատ, հարցվածների 73,8 տոկոսը նշել է` ՀՀԿ-ի, 46,3 տոկոսը` «Ելք» դաշինքի, իսկ 32,5 տոկոսը՝ «Երկիր ծիրանի»-ի:

«Քաղաքական ուժերի ու դաշինքների նախընտրական ծրագրերի հետ ծանոթացե՞լ եք» հարցին, հարցվածների 42,8 տոկոսը պատասխանել է` այո, որից ՀՀԿ-ի ծրագրին ծանոթացել է 78,5 տոկոսը, «Ելք» դաշինքի ծրագրին` 47,4 տոկոսը, իսկ «Երկիր ծիրանի» ծրագրին` 36,5 տոկոսը:

Հարցին՝ մասնակցո՞ւմ եք քաղաքական ուժերի հանդիպումներին՝ համայնքների, բակերի հավաքներին 16,7 տոկոսը պատասխանել է՝ այո, որից ՀՀԿ-ի բակային հանդիպումներին մասնակցում է 80,4 տոկոսը, «Ելք» դաշինքի հանդիպումներին` 20,7 տոկոսը, «Երկիր ծիրանի»-ի հավաքներին` 11,2 տոկոսը:

«Մայիսի 14-ի` ավագանու ընտրություններին  մասնակցելո՞ւ եք» հարցին 67,1 տոկոսը պատասխանել է՝ միանշանակ այո, ավելի շուտ մասնակցելու է 15,4 տոկոսը, իսկ հարցվածների 10,4 տոկոսը պատասխանել է, որ չի մասնակցելու:

Եվ վերջին հարցին, թե ում են ընտրելու, հարցվածների 72,3 տոկոսը պատասխանել է` Տարոն Մարգարյանին, Նիկոլ Փաշինյանի օգտին քվեարկելու է հարցվածների 15,5 տոկոսը, իսկ 4,7 տոկոսը՝ Զարուհի Փոստանջյանի: Դժվարացել է պատասխանել հարցվածների 3,2 տոկոսը, հրաժարվել է պատասխանել հարցվածների 4,3 տոկոսը: