Խաղատներում 1 միլիոն դրամից ավելի գործարք կատարողի անձնական տվյալները պահվելու են շտեմարանում

Կառավարության վաղվա նիստի օրակարգում ֆինանսների նախարարությունը ներառել է որոշում, այն է` սահմանել շահումով խաղերի, ինտերնետ շահումով խաղերի և խաղատների կազմակեր­պիչ­ների կողմից մեկ միլիոն դրամից ավելի գոր­ծարք­ներ իրականացնող հաճա­խորդ­ների նույնակ­ա­նացման, տվյալների շտեմա­րանի ստեղծման և պահպա­ն­ման կարգը:

Այս որոշումը կարգավորում է շահումով խաղերի, ինտերնետ շահումով խաղերի և խաղատների կազմակերպիչների կողմից  «Փողերի լվացման և ահաբեկչության ֆինանսավորման դեմ պայքարի մասին» օրենքով և «Շահումով խաղերի, ինտերնետ շահումով խաղերի և խաղատների մասին» օրենքներով սահմանված մեկ միլիոն դրամից ավելի գոր­ծարք­ներ իրականացնող հաճա­խորդ­ների նույնակ­ա­նացման, տվյալների շտեմարանի ստեղծման և պահպա­ն­ման կարգի հետ կապված հարաբերությունները:

1 միլիոն դրամը գերազանցող որևէ գործարքի (փոխկապակցված միանգամյա գործարքների) մասով (բացառությամբ փողերի լվացման կամ ահաբեկչության ֆինանսավորման կասկածների առկայության, որի դեպքում հաճախորդի պատշաճ ուսումնասիրությունն իրականացվում է անկախ գումարային սահմանաչափից): 

Կազմակերպիչը մեկ միլիոն դրամից ավելի գոր­ծարք­ներ իրականացնող հաճախորդին նույնականացնում և նրա ինքնությունը ստուգում է պետական իրավասու մարմնի տված արժանահավատ ու վավեր փաստաթղթերի և այլ տեղեկությունների հիման վրա: Այդ  տեղեկությունները պետք է հաշվառվեն և պահպանվեն տվյալների շտեմարանում: 

Մեկ միլիոն դրամից ավելի գոր­ծարք­ներ իրականացնող հաճա­խորդ­ների նույնակ­ա­նացման տվյալների շտեմարանում պահվող տեղեկությունները պետք է առնվազն ներառի յուրաքանչյուր հաճախորդի վերաբերյալ հետևյալ տեղեկությունները. հաճա­խորդի անունը, ազգանունը, քաղաքացիությունը, հաշվառման հասցեն (առկայության դեպքում), ծննդյան տարին, ամիսը, ամսաթիվը, վայրը, անձը հաստատող փաստաթղթի սերիան, համարը, տրամադրման տարին, ամիսը, ամսաթիվը,  հաճախորդի բնակության վայրը:

Սույն որոշման ընդունմամբ հնարավոր կլինի ապահովել բնագավառում «Փողերի լվացման և ահաբեկչության ֆինանսավորման դեմ պայքարի մասին» օրենքով սահմանված պահանջների կատարումը: