ԴԱՀԿ ծառայողի կողմից պաշտոնեական կեղծիք կատարելու դեպքի առթիվ քրգործ է հարուցվել. Գլխավոր դատախազություն

ՀՀ ԱՆ ԴԱՀԿ ապահովող ծառայության Շիրակի մարզային բաժնի Արթիկի բաժանմունքի ավագ հարկադիր կատարող Է.Կ.-ն 14.01.2016թ. որոշում է կայացրել կատարողական վարույթ հարուցելու մասին, որի շրջանակներում արգելանք է դրվել Է.Պ.-ին պատկանող բնակարանի վրա:  

Այս մասին հայտնում են ՀՀ գլխավոր դատախազությունից։ 

21.01.2016թ. Է.Կ.-ն առանց արգելադրված բնակարան այցելելու, իր աշխատասենյակում անձնական այլ դրդումներով առերույթ կատարել է պաշտոնեական կեղծիք՝ արձանագրություն կազմելով այն մասին, որ այցելել է պարտապանի բնակարան, որտեղ բռնագրավման ենթակա գույք չի հայտնաբերվել, մինչդեռ ըստ պարտապանի հաղորդման, բնակարանում առկա է եղել 8000 ԱՄՆ դոլար ընդհանուր արժողության գույք: 

Դեպքի առթիվ ՀՀ ՔԿ Շիրակի մարզային քննչական վարչությունում ՀՀ քրեական օրենսգրքի 314-րդ հոդվածի 1-ին մասով հարուցվել է քրեական գործ:

Քրեական գործի նախաքննությունը հանձնարարվել է ՀՀ հատուկ քննչական ծառայությանը: