Հայաստանը ձգտում է կամուրջ դառնալ ԵՏՄ-ի և ԵՄ-ի միջև. Կարեն Կարապետյանի հարցազրույցը` Известия-ին

ՀՀ վարչապետ Կարեն Կարապետյանը հարցազրույց է տվել ռուսական Известия թերթին, որում անդրադարձել է ռուս-հայկական համագործակցության հեռանկարներին, ինչպես նաև Հայաստանի` ԵՏՄ-ին միանալուն ու ներքին բարեփոխումներին:

«ԵՏՄ-ի ներուժը շատ ավելին է, քան մենք մտածում ենք: ԵՏՄ-ին անդամակցությունը հնարավորություններ է ստեղծում Հայաստանի համար: Մեր պատրաստի արտադրանքի մեծ մասը մենք արտահանում ենք ԵՏՄ-ի շուկաներ: Այդ կապակցությամբ պետք նշել, որ միությանը միանալուց հետո ՀՀ ՀՆԱ-ի ցուցանիշներն աճել են»,- նշել է վարչապետը:

 «Հայաստանը նաև ցանկանում է կամուրջ դառնալ ԵՏՄ ակումբի և այլ տնտեսական բլոկների միջև, օրինակ` Եվրոպական Միության, ԵՄ-ի հետ ասոցացման համաձայնագիր ստորագրած երկրների, ինչպես նաև Իրանի ու Մերձավոր Արևելքի երկրների միջև»,- հավելել է Հայաստանի վարչապետը:

Խոսելով ԵՄ-ի հետ հարաբերությունների մասին` Կարապետյանն ընդգծել է, որ Հայաստանը, խորացնելով գործընկերությունը ԵՏՄ-ի երկրների հետ, չի դադարեցնում համագործակցությունը ԵՄ-ի հետ: «Մենք սահմանափակումներ չունենք  ԵՄ-ի հետ համագործակցության, ներդրումների և երկխոսության հարցում: Ներկայումս բաց և թափանցիկ երկխոսություն ենք վարում եվրոպական գործընկերների հետ: Մենք մեզ տեսնում ենք որպես այդ երկու շուկաներն իրար մոտեցնող, որ թե իրարից բաժանող երկիր»,- ասել է նա:

Ինչ վերաբերում է ռուս-հակական համագործակցությանը, Կարեն Կարապետյանը նշել է, որ Ռուսաստանը Հայաստանի կարևորագույն գործընկերն է և խոշորագույն ներդրողը: «Մենք հետաքրքված ենք, որ մեր ռուս գործընկերները նոր ծրագրեր գտնեն ներդրումներ կատարելու համար: Հայաստանը բաց է ներդրումների համար: Մենք առաջարկելու բան ունենք ներդրողներին և պայմաններ ենք ստեղծում նրանց համար, որպեսզի նրանք կարողանան նորմալ բիզնեսով զբաղվել, գումար աշխատել, նոր աշխատատեղեր ստեղծել, հարկեր մուծել»,- ասել է նա:

Կարապետյանը նշել է նաև, որ Հայաստանի և Ռուսաստանի քաղաքացիների փոխադարձ` առանց վիզայի այցելությունների մասին համաձայնագիրը, ինչպես նաև կանոնակարգը, որով ռուսաստանցիները կարող են ՀՀ այցելել իրենց ներքին անձնագրերով, մեծ խթան է տուրիզմի և մշակութահումանիտար հարաբերությունների զարգացման համար: