Երբ մարդիկ անկեղծ հավատում են քեզ, դա հսկայական պատասխանատվություն է. Կարեն Կարապետյանի հարցազրույցը` Известия-ին

ՀՀ վարչապետ Կարեն Կարապետյանը հարցազրույց է տվել ռուսական Известия թերթին, որում անդրադարձել է ռուս-հայկական համագործակցության հեռանկարներին, Հայաստանի` ԵՏՄ-ին միանալուն և ներքին բարեփոխումներին:

Խոսելով մարդկանց`իր հանդեպ ունեցած համակրանքի մասին` նա նշել է` երբ մարդիկ անկեղծ հավատում են քեզ, դա հսկայական պատասխանատվություն է: «Ես հասկանում եմ դա և շատ պատասխանատու կերպով եմ դրան վերաբերվում: Հանրապետական կուսակցության հաղթանակից հետո մեր կառավարությունը կշարունակի բարեփոխումների ընթացքը, որ մենք սկսել ենք, և ես կասեի՝ հաջողությամբ առաջ ենք տանում այս վեց ամիսների ընթացքում: Մեր կառավարությունը բաց է և' քննադատության, և' համագործակցության համար: Մենք ձգտում ենք վերականգնել իշխանության նկատմամբ վստահությունը, գտնել տնտեսական և սոցիալական լուծումներ, որոնք երաշխավորում են պետության կայուն զարգացում՝ սկսած այսօրվանից և գալիք տասնամյակներում, որոնք կամրապնդեն Հայաստանի դիրքերը տարածաշրջանում: Մենք շահագրգռված ենք մեր երկրի կայացման հարցում»,- ասել է Կարեն Կարապետյանը: