Ընտրությունների վերջնական արդյունքից շատերը կզարմանան. Կարեն Քոչարյան

Ի տարբերություն նախորդ ընտրությունների` այս քարոզարշավը խարսխված է լիդերների վրա` սա է առանձնահատկությունը: Այս մասին լրագրողների հետ զրույցում նշեց քաղտեխնոլոգ Կարեն Քոչարյանը:

Ըստ նրա` ՀՀԿ-ն, ԲՀԿ-ն և ՕՐՕ-ն քարոզարշավի ժամանակ բացառապես հանդես են գալիս մեկ անձով, ինչը էլ այս ընտրությունների տարբերությունն է:

«Քարոզարշավի ժամանակ պոպուլիզմի պակաս չզգացինք, իսկ ներդրումների հետ կապված` կարծես ով ինչ ուզում, ինչքան թիվ ուզում` ասում է: Ինչ վերաբերում է կուսակցությունների վարկանիշին, ապա ՀՀԿ-ի` ընկած վարկանիշն ինչ-որ չափով բարձրացրեց Կարեն Կարապետյանը, իսկ մյուսների հետ կապված` կարծում եմ, որ խորհրդարանում կլինեն ՀՀԿ-ն, ԲՀԿ-ն, ՀՅԴ-ն, «Ազատ դեմոկրատները», «Ելքը» և ՀՎԿ-ն: ՕՐՕ-ն… չնայած նրանց երեկվա հանրահավաքը բազմամարդ էր, բայց դա ոչինչ չի նշանակում»,-ասաց Քոչարյանը:

Նա նշեց նաև, որ այս ընտրություններում ռեյտինգային թեկնածուներն են լինելու որոշիչը, չնայած ընտրությունների վերջնական արդյունքից` թվերից, շատերը կարող են զարմանալ: