Մեծ Պահքի շրջանում սիրո, համերաշխության, հանդարտության կոչ եմ անում. Շարմազանով

Այսօր լրագրողների հետ զրույցում ԱԺ փոխխոսնակ Էդուարդ Շարմազանովն անդրադարձավ այն միջադեպերին` ծեծկռտուք, դանակահարություն, որոնց  մասնակից կողմերից մեկը ՀՀԿ-ական է կամ ՀՀԿ-ական թեկնածուի թիմից:

 Նրա խոսքով` կարիք չկա ամեն միջադեպ կապել ՀՀԿ-ի հետ, որովհետև մոտ 1600 թեկնածու կա, նրանցից ամեն մեկն ունի  ծանոթ, ընկեր, բարեկամ, որոնք կարող են որևէ միջադեպի մասնակից լինել:

Շարմազանովը հավելեց, որ օրերս կենցաղային բնույթի մի միջադեպ էր եղել` դանակահարել էին մի երիտասարդի, ով ՀՀԿ-ական էր: Բայց դա չէր նշանակում, որ ՀՀԿ-ականները պետք է քաղաքականացնեին դա` հայտարարելով, որ ՀՀԿ-ականի վրա հարձակվել են:

«Եթե կա միջադեպ, ուրեմն դա պետք է պարզեն իրավապահ մարմինները, օրենքը խախտողը պետք է պատժվի: Մենք դրա մասին ասել ենք մեր բոլոր թիմակիցներին: Վենդետա, արյունահեղություն անթույլատրելի են միշտ: Մեծ Պահքի շրջանում սիրո, համերաշխության,  հանդարտության կոչ եմ անում: Մեր երկրում վենդետաները պետք է մնան անցյալում, մենք հակառակորդ ու թշնամի չունենք մեր երկրում: Կարիք չկա մրջյունից փիղ սարքել: Բերեք դատավորի ու մեղադրյալի ֆունկցիա չվերցնենք մեզ վրա»,- ասաց նա: