Սա ընտրություն է, ոչ թե կռիվ կինո. ՀՀԿ-ականները Մեծ պահքի մեջ են

Այսօր ԱԺ հայտարարությունների ժամին ԲՀԿ-ականները խոսեցին իշխանությունների կողմից ընտրակեղծիքների փաստերի դեմ, ՀԱԿ խմբակցության պատգամավորները` երկրի անվտանգության կարևորության մասին, ՀՀԿ-ականները` իրենց դեմ իրականացվող հակափիարի մասին:

ԱԺ նախագահի տեղակալ Էդուարդ Շարմազանովը նշեց, որ ներկայանալու են ընտրողին իրատեսական, այլ ոչ ականջահաճո գաղափարներով:

«Մեր կարգախոսը բազմաթիվ մարդիկ քննադատեցին, բայց պետք է հիշել Թետչերի խոսքերը. «Եթե իշխանությունները նույնիսկ քայլեն գետի վրայով, կգտնվեն ընդդիմադիրներ, որոնք դա կբացատրեն իշխանությունների` լողալ չիմանալով»,- ասաց Շարմազանովը:

Նա հորդորեց քաղաքական ուժերին առաջնորդվել հայրենիքի շահով, զերծ մնալ հայհոյանքից, անձերի միջև պայքարից, չնսեմացնել, չսևացնել դիմացինին:

ՀՀԿ-ական Նաիրա Կարապետյանն էլ հորդորեց քաղաքական ուժերին մնալ բարեկրթության շրջանակներում, ներկայանալ կոնկրետ քայլերով, գաղափարներով, ոչ թե պայքարել իշխանությունների դեմ: «Սա ընտրություն է ոչ թե կռիվ կինո: Առաջարկեք ձերը, մի զբաղվեք պոպուլիզմով: Հիշենք Չերչիլի խոսքերը. «Պատասխանատվությունն է այն գինը, որը վճարում ենք իշխանության դիմաց»:

ՀՀԿ-ական Ռուզաննա Մուրադյանը նշեց, որ անիմաստ է խոսել ՀՀԿ-ի ձեռքբերումների մասին, որովհետև դրանք արդեն փաստ են:

Իսկ ՀՀԿ-ական Վահրամ Մկրտչյանն էլ նշեց` ընդդիմադիրներ կան, որոնք երազում են պատգամավոր դառնալու մասին: «Ընտրությունները համընկել են Մեծ պահքի հետ, երբ պետք է զերծ մնանք ստից, վատ մտքերից»,- ասաց նա` պահքին վերաբերող բարոյախրատական ճառ հնչեցնելով ամբիոնից: