2016-ին ռեկորդային թվով երեխա է զոհվել սիրիական հակամարտությունում

016-ին ավելի քան 650 երեխա է Սիրիայում շարունակվող հակամարտության զոհ դարձել: Այդ մասին մարտի 13-ին հայտնել է ՄԱԿ-ի Մանկական հիմնադրամը՝ ՅՈւՆԻՍԵՖ-ը: Ըստ միջազգային կազմակերպության, դա առավելագույն թիվն է վերջին 3 տարում, երբ համապատասխան վիճակագրություն է տարվել:

Ընդ որում, անմիջապես դպրոցներում կամ դրանց հարևանությամբ 2016-ին առնվազն 255 երեխա է զոհվել, իսկ 1,7 միլիոնը ուսումնական հաստատություն հաճախելու հնարավորություն չունի, գրում է «Deutsche Welle»-ն:

Սիրիայի դպրոցական շենքերի մեկ երրորդը հնարավոր չէ օգտագործել ըստ նշանակության, քանի որ մի մասը զբաղեցրել են զինյալ խմբավորումները: Մարտական գործողությունների մեջ ներքաշված է ավելի քան 850 երեխա: Այդ ցուցանիշը 2 անգամ գերազանցում է 2015-ի ցուցանիշը:

Սիրիայից մոտ 2,3 մլն երեխա է հեռացել հարևան երկրներ որպես փախստական: Եվս 6 մլն անմիջական կախում ունի հումանիտար օգնությունից, իսկ 250.000 պաշարված շրջաններում լինելու պատճառով զրկված է մարդասիրական օգնությունից: