Բնապահպանների մտահոգությունը քննարկվում է. Արծվիկ Մինասյան

Այսօր` կառավարության նիստից հետո, ՀՀ բնապահպանության նախարար Արծվիկ Մինասյանը լրագրողների հետ զրույցում անդրադարձավ էկոհամակարգի խնդիրներին` ասելով, որ ոլորտին առնչվող բոլոր տիպի ծրագրերը հաշվի են առնվելու զարգացման երեք հիմնական սկզբունքների համատեքստում` տնտեսական, սոցիալական և էկոլոգիական:

«Ցանկացած լուծում կամ առաջարկ, որն այս երեք սկզբունքները առանց հավասարակշռելու կիրականացնի, դուրս կգա կայուն զարգացման մատեցումից, իսկ դրան մենք դեմ ենք»,- ասաց նախարարը:

Հարցին` արդյո՞ք նախընտրական ժամանակահատվածում կքաղաքականացվեն էկոլոգիական խնդիրները, Արծվիկ Մինասյանը պատասխանեց, որ բնապահպանական խնդիրները միշտ քաղաքականացված են, որովհետև շրջակա միջավայրի պահպանումն ու բարելավումը սահմանադրական պահանջ է և չի կարող քաղաքականությունից դուրս լինել:

Հարցին, թե ինչո՞ւ բնապահպանության նախարարությունը լուրջ չի վերաբերվել «Հիդրոմետ» ծառայության կանխատեսումներին, և Սևանի սառցակալման պատճառով որոշ թռչուններ սատկել են, Արծվիկ Մինասյանը պատասխանեց. «Ես չգիտեմ, թե  ով է նման մեղադանք հնչեցրել բնապահպանության նախարարության հասցեին, որովհետև  բնապահպանների մտահոգությունն այժմ քննարկվում է հենց բնապահպանների ակտիվ մասնակցությամբ: Ըմբռնենք յուրաքանչյուր գերատեսչության լիազորությունները: Բնապահպանության նախարարությունը պետք է ունենա անհրաժեշտ ֆինանսական միջոցներ, որ, օրինակ, իրականացնի սառցե բեկորների հատում կամ թռչունների կերակրման աշխատանքներ»: