Բնապահպանների հեղափոխական հաղթանակը

Կառավարության որոշման համաձայն` Թռչկանի ջրվեժը ստացել է հատուկ պահպանվող տարածքի կարգավիճակը, դրա վրա ՀԷԿ-ի կառուցման աշխատանքները դադարեցվել են:

Լրագրողների հետ հանդիպման ժամանակ «Պահպանենք Թռչկանի ջրվեժը» նախաձեռնող խմբի անդամ, բնապահպանության փորձագետ Արման Վերմիշյանը Թռչկանի համար պայքարը եւ դրա արդյունքը որակեց «աննախադեպ երեւույթ», բնապահպանության ոլորտում` հեղափոխություն: Նախաձեռնությունն անվանելով անկազմակերպ, բայց հրաշալի կազմակերպված` բանախոսը վստահեցրեց, որ սրանով նախաձեռնությունն իր գործունեությունը չի դադարեցնում. դեռ բազմաթիվ բնապահպանական խնդիրներ կան, որոնք եւս պետք է լուծում ստանան:

Նախաձեռնության խմբի անդամը նշեց, որ իրենց պայքարի արդյունքում այսօր Հայաստանում չկա որեւէ մեկը, ով լսած չլինի Թռչկանի մասին: «Յուրահատուկ բրենդ դարձավ Թռչկանը: Հիմա պետք է մտածենք բրենդը վաճառելու մասին»,- կեսկատակ-կեսլուրջ նշեց Վերմիշյանը եւ հավելեց, որ ակտիվիստների խումբն արդեն վերադարձել է Թռչկանից: