«Օսկար» մրցանակի ներկայացված «Սպիտակ սաղավարտներ» ֆիլմի` սիրիացի օպերատորի մուտքն ԱՄՆ թույլ չեն տվել

ԱՄՆ ներգաղթային իշխանությունները թույլ չեն տվել սիրիացի օպերատոր Խալիդ Խատիբի մուտքն ԱՄՆ, որն աշխատել է «Օսկար» մրցանակի ներկայացված «Սպիտակ սաղավարտներ» ֆիլմում, հայտնում է «Associated Press» գործակալությունը։

ԱՄՆ ներքին անվտանգության նախարարությունը վերջին րոպեին արգելել է Խատիբի մուտքը երկիր։ Նրան մերժել են «վարկաբեկող բնույթի տեղեկության» հայտնաբերումից հետո։ Այս կատեգորիան, ինչպես նշում է գործակալությւնը, կարող է ներառել ինչպես տվյալ անձի ահաբեկչության հետ կապ ունենալու մասին տվյալներ, այնպես էլ անձնագրի հետ ունեցած խնդիրները։

«Օսկար» մրցանակաբաշխությունը տեղի կունենա փետրվարի 26-ին՝ Հոլիվուդում: 40 րոպե տևողությամբ «Սպիտակ սաղավարտներ» ֆիլմը պատմում է Սիրիայում պատերազմի մասին։ Այն «Օսկարի» է ներկայացվել «Լավագույն կարճամետրաժ վավերագրական ֆիլմ» անվանակարգում։