Զավեշտ` Թուրքիայի մեջլիսում. Էրդողանի կուսակիցները Օսկար Ուայլդին շփոթել են «Օսկար» մրցանակաբաշխության հետ

Զավեշտալի մանրամասներ են հայտնի դարձել երեկ Թուրքիայի մեջլիսում պատգամավորներին անձեռնմխելիությունից զրկելու վերաբերյալ քննարկումների նիստից:

Ըստ Bianet-ի` քննարկումների նիստի ընթացքում քրդամետ կուսակցության պատգամավոր Միթաթ Սանջարը մեջբերել է հանրահայտ գրող Օսկար Ուայլդի խոսքերը: Դա վրդովեցրել է  Էրդողանի «Արդարություն և զարգացում» կուսակցության պատգամավոր Զեյիդ Ասլանին: Նա հարցրել է. «էդ ո՞վ է, է»:

Սանջարը հորդորել է ինքնուրույն պարզել, հակառակ դեպքում՝  խոստացել «անձամբ սովորեցնել», սակայն ԱԶԿ-ական պատգամավոր Ադնան Գյուննարլաթերը Սանջարին խնդրել է պատմել «Օսկարյան մրցանակաբաշխության մասին»։

«Նա Օսկար Ուայլդն է, ոչ թե` մրցանակաբաշխությունը։ Մարդու անունն Օսկար Ուայլդ է»,- բացատրել է ԺԴԿ-ից պատգամավոր Օզքանը։

Հիշեցնենք, որ երեկ պատգամավորների անձեռնմխելիության վերաբերյալ քննարկումների ժամանակ ծեծկռտուք էր տեղի ունեցել ԺԴԿ-ի և Էրդողանի կուսակցության պատգամավորների միջև, ինչից հետո քրդամետ պատգամավորները, այդ թվում` Կարո Փայլանը, լքել էին դահլիճը: Նրանց բացակայության ընթացքում ընդունվել էր առաջարկ` փոփոխություններ մտցնել Սահմանադրության մեջ` մի շարք պատգամավորների անձեռնմխելիությունից զրկելու համար: