Սեուլը բարձրախոսներով հյուսիսկորեացիներին կպատմի Կիմ Չեն Ընի եղբոր սպանության մասին

Հարավային Կորեայի իշխանությունները մտադիր են ԿԺԴՀ-ի սահմանին բարձրախոսներ տեղադրել և դրանց միջոցով հյուսիսկորեացիներին պատմել ԿԺԴՀ առաջնորդ Կիմ Չեն Ընի եղբոր սպանության մասին: Այդ մասին, ըստ РИА Новости-ի, «Յոնհապ» հարավկորեական գործակալությանը հայտնել են դիվանագիտական և զինվորական շրջանակների ներկայացուցիչներ:

Նրանք նշել են, որ հավանականությունը, որ Կիմ Չեն Ընը կապ չունի եղբոր սպանության հետ, չափազանց փոքր է: Հարավկորեական իշխանությունները հույս ունեն, որ տեղեկացված հյուսիսկորեացիները կհասկանան «գործող ռեժիմի ողջ դաժանությունը»: 

Կիմ Չեն Ընի եղբորը թունավորել են Կուալա Լումպուրի օդանավակայանում: Քննիչների կարծիքով` հանցագործները կանայք են, ովքեր դեռևս չեն հասցրել լքել Մալայզիայի տարածքը: Ճապոնացի մասնագետների կարծիքով` նրանք, հնարավոր է, արդեն ողջ չեն: ԱՄՆ-ում համոզված են, որ Կիմ Չեն Նամը սպանվել է ԿԺԴՀ հատուկ ծառայությունների կողմից: