Նախընտրական ամուսնություններ են, որոնք ավարտվելու են հետընտրական ապահարզանով. Խոսրով Հարությունյան

Այսօր օրերին քաղաքական ուժերը միմյանց հետ բանակցությունների մեջ են` քննարկելու հնարավոր դաշինքներով խորհրդարանական ընտրություններին մասնակցելու տարբերակները: Արդեն իսկ կազմվել և նշմարվում են մի քանի դաշինքներ: Այսօր լրագրողների հետ զրույցում, խոսելով դաշինքների մասին, ԱԺ ՀՀԿ խմբակցության պատգամավոր Խոսրով Հարությունյանը հույս հայտնեց, որ դրանք իրական կլինեն, գաղափարական հենքի վրա կազմված կլինեն ու կդառնան իրական քաղաքական միավորումներ:

«Այդ դաշինքները մեծ մասամբ նախընտրական ամուսնություններ են, որոնք ավարտվելու են հետընտրական ապահարզանով: Շատ դաշինքներ կարող են կազմվել այսրոպեական, կարճաժամկետ խնդիրներ լուծելու նպատակով: Նրանք ապագա ունենալ չեն կարող: Եթե անգամ հայտնվեն խորհրդարանում, ապա ընտրություններից հետո են փախչելու միմյանցից»,- ասաց Խոսրով Հարությունյանը:

Գագիկ Ծառուկյանի վերադարձը քաղաքականություն ՀՀԿ-ական պատգամավորը շատ նորմալ է գնահատում` կարծելով, որ դա կնպաստի ընտրություններում  մրցակցության մեծացմանը: Պատգամավորը միաժամանակ նկատում է`  ընդդիմադիր գաղափարախոսությունն ամբողջությամբ կազմված է ոչ թե հանրային կյանքի ավելի լավ կազմակերպման հենքի վրա, այլ` ընդդեմ ՀՀԿ-ի: Դա, ըստ պատգամավորի, կարող է հանգեցնել վտանգավոր հետընտրական զարգացումների: Շատ քաղաքական ուժեր մատնանշում են արատներ, բայց չեն մատնանշում` իսկ ինչպե՞ս շտկել այդ արատները:

Խոսրով Հարությունյանի գլխավորած Քրիստոնեա-դեմոկրատական կուսակցությունն առանձին չի մասնակցի խորհրդարանական ընտրություններին, իսկ թե ինչպե՞ս կմասնակցի, եթե առանձին չի մասնակցելու, նա նշեց, որ ժամանակը ցույց կտա: «Մենք բավական լավ գիտակցում ենք մեր հնարավորություններն ու կարողությունները, ուստի ավելորդ հավակնություններ չունենք. առանձին չենք մասնակցելու ընտրություններին»,- ասաց Խոսրով Հարությունյանը:

Միաժամանակ, նա հավելեց, որ իր ղեկավարած կուսակցության և ՀՀԿ-ի համագործակցությունն անարդյունավետ չի եղել, և ենթադրվում է, որ հետագա համագործակցության ինչ-որ ձևաչափ կգտնվի: Եթե անգամ ՀՀԿ-ից համագործակցության առաջարկ չստանան, ապա որևէ այլ ուժի չեն հարելու:

Պատգամավորը համաձայն չէ այն ձևակերպման հետ, թե ՀՀԿ-ի նկատմամբ ժողովրդի մոտ համընդհանուր հիասթափություն կա, համաձայն է, որ ՀՀԿ-ի նկատմամբ ժողովուրդը պահանջներ է դնում, և որ ՀՀԿ-ն ունեցել է որոշ վրիպումներ:

«Ով աշխատում է, նրան են քննադատում, չաշխատողի ի՞նչը քննադատես: Եվ հետո` ժողովուրդը հիասթափված է առհասարակ բոլոր կուսակցություններից` ոչ միայն ՀՀԿ-ից, այլ նաև ընդդիմությունից: Պատահական չէ, որ «էլեկտրիկ Երևան»-ի քաղաքացիական բողոքի ժամանակ հանրությունը մերժեց ընդդիմադիր որևէ ուժի մասնակցությունը, ինչը նշանակում է, որ ընդդիմադիր ուժերին չեն վստահում»,- ասաց Խոսրով Հարությունյանը: