Եթե կա մեկը, որ մոլորեցնում է հանրությանը, դա Զարուհի Փոստանջյանն է. Խոսրով Հարությունյան

Այսօր ԱԺ` կառավարության նախաձեռնած արտահերթ նիստում քննարկվում է ՀՀ նախագահի ներկայացրած` ՀՀ կառավարության և ՌԴ կառավարության միջև կնքված` ՀՀ կառավարությանը 200 միլիոն դոլարի չափով պետական արտահանման վարկ տրամադրելու մասին համաձայնագրի վավերացման հարցը:

ՀՀԿ խմբակցության պատգամավոր Խոսրով Հարությունյանը ելույթ ունեցավ` գովելով վարկային համաձայնագիրը: Նա հիշեցրեց, թե ինչ կրքերով էր բորբոքված հասարակությունը, երբ խոսքը գնում էր Պերմյակովին անհապաղ Հայաստանին հանձնելուն: Ըստ պատգամավորի` այսօր արդեն Պերմյակովը հանձնված է ՀՀ արդարադատությանը, և դա, ըստ նրա, Հայաստանի իշխանությունների տարած աշխատանքի արդյունքն է:

Տեղից բորբոքված արձագանքեց «Ժառանագություն» խմբակցության պատգամավոր Զարուհի Փոստանջյանը: Նա ասաց, որ Խոսրով Հարությունյանը ապատեղեկատվություն է տարածում ու խաբում մարդկանց:

«Ուրեմն` եթե կա մեկը, ով համառորեն փորձում է հանրությանը մոլորեցնել, դա պատգամավոր Զարուհի Փոստանջյանն է: Ես դա հայտարարում եմ ամենայն պատասխանատվությամբ և կարող եմ ապացուցել»,- զայրացավ Խոսրով Հարությունյանը:

Մի քանի ՀՀԿ-ականներ տեղից արձագանքեցին. «Այո, այդպես է»: