Մոսկվայում ձերբակալել են ավելի քան 40 ընդդիմադիր ակտիվիստի

Մոսկվայի կենտրոնում ձերբակալել են ընդդիմության չարտոնված հանրահավաքի մասնակիցներին, հայտնում է «Ինտերֆաքս»-ը:

Բողոքի ակցիան ընթանում է «Չիստիե պրուդիում» ՝ Գրիբոյեդովի արձանի դիմաց: Գործակալության տեղեկություններով՝ ձերբակալվել է ավելի քան 40 մարդ: Մոտ 20 հոգի էլ շարունակում են հանրահավաքը:

«ՕՎԴ Ինֆո»-ն հայտնում է, որ ձերբակալվել են 4 ավտոբուսով ժամանած ցուցարարները: Երկու ավտոբուսում եղել է 14 մարդ, մեկում՝ 16: Թե քանի մարդ է եղել չորրորդ ավտոբուսում, հայտնի չէ: Նրանց մի մասը տեղափոխվել է ոստիկանության Բասմանի բաժանմունք, իսկ մյուս մասը՝ Մեշանսկի:

Ցուցարարները պաշտպանում են դատապարտված ընդդիմադիր Իլդար Դադինին, որին 3 տարվա ազատազրկման են դատապարտել հանրային միջոցառումների անցկացման կարգի խախտման համար: