Ռուսական Սու-24-ի խոցման հրամանը անձամբ եմ տվել. Դավութօղլու

Թուրքիայի նախկին վարչապետ Ահմեդ Դավութօղլուն երկրում հուլիսի 15-ի ռազմական  հեղաշրջման փորձի հետաքննությամբ զբաղվող հանձնաժողովի անդամների հարցերին պատասխանելիս անդրադարձել է նաև ռուսական Սու-24 ինքնաթիռի խոցմանը:

Ըստ Hurriyet-ի՝ Դավութօղլուն հերքել է թուրքական իշխանությունների այն թեզը, թե ռուսական Սու-24 ինքնաթիռը խոցած թուրք զինծառայողը կապ է ունեցել հուլիսի 15-ի հեղաշրջման փորձի կազմակերպման մեջ մեղադրվող թուրք կրոնական քարոզիչ Ֆեթուլլահ Գյուլենի հետ: «Ինքնաթիռը խոցելու հրամանը ես անձամբ եմ տվել»,- նախկինում արած հայտարարությունը կրկնել է Դավութօղլուն:

Հիշեցնենք, որ ռուսական ինքնաթիռի խոցումից հետո սրվել էին Թուրքիայի և ՌԴ-ի հարաբերությունները: Ռուսաստանը պատժամիջոցներ էր սահմանել Թուրքիայի նկատմամբ, սակայն 2016-ի սկզբին Թուրքիայի նախագահ Ռեջեփ Թայիփ Էրդողանի ներողությունից հետո վերականգնվել էին ՌԴ-Թուրքիա հարաբերությունները: