Անկարան չի բացառել ռուսական Սու-35 և Սու-57 կործանիչների գնումը

Թուրքիան չի բացառում ռուսական Սու-35 և Սու-57 կործանիչներ գնելու հնարավորությունը, բայց առաջնայինը սեփական հինգերորդ սերնդի կործանիչների զարգացումն է։ Այս մասին հայտարարել է հանրապետության արդյունաբերության և տեխնոլոգիաների նախարար Մուստաֆա Վարանքը:

«Եթե Ռուսաստանն ունի մեր ներկայիս կարիքները բավարարող ինքնաթիռ, եթե մեր համակարգում դրա ներդրման և գործարկման հետ կապված դժվարություններ չկան, ապա, իհարկե, կարող ենք գնել Ռուսաստանից կամ Եվրոպայի այլ երկրից»,- ասել է նա՝ պատասխանելով Թուրքիայի՝ Սու-35 և Սու-57 գնելու հնարավորության մասին հարցին:

Ըստ նրա՝ այդ խնդիրները հաճախ են բարձրացվում երկու երկրների ղեկավարների հանդիպումներում: «Իհարկե, մեր առաջնահերթությունը, հինգերորդ սերնդի կործանիչների զարգացման գործում Թուրքիայի սեփական կարողությունների զարգացումն է: Բայց եթե Ռուսաստանն ունենա մեր կարիքներն ու խնդիրները բավարարող ինքնաթիռ, Թուրքիան այն ձեռք կբերի», - Վարանքին մեջբերում է ՌԻԱ-ն: