Կվերանայվի անապահովության գնահատման համակարգը

Այսօր կառավարության` այս տարվա վերջին նիստում վարչապետ Կարեն Կարապետյանը կարևոր հանձնարարականներ տվեց սոցիալական ոլորտի վերաբերյալ: Հիշեցնենք, որ ԱԱԾ-ն կոռուպցիոն ռիսկերի կասկածանքով ձերբակալել են սոցիալական ոլորտի մի քանի ներկայացուցիչների:

Վարչապետը մասնավորապես անդրադարձավ նպաստների հարցին` ասելով, որ արդյունավետության ու հասցեականության համար առաջին հերթին պետք են բարեփոխումներ անապահովության գնահատման համակարգում:

Կառավարության ծրագրի համաձայն` պետք է իրականացվի անապահովության գնահատման մոտեցումների և մեթոդաբանության արմատական վերանայում` հիմք ընդունելով ընտանիքի յուրաքանչյուր աշխատունակ անդամի զբաղվածության ապահովման և պետական սոցիալական աջակցության ծրագրերը, հատկապես` բնակչության անաշխատունակ շերտերին ուղղելով սկզբունքային մոտեցումներ:

Վարչապետը հանձնարարեց աշխատանքի և սոցիալական նախարարին` մեկամսյա ժամկետում կառավարության քննարկմանը ներկայացնել համապատասխան որոշման նախագիծ անապահովման գնահատման համակարգում ամեն գնով 30 միավոր ձեռք բերելու մղումը ապախթանելու և ընտանիքի առաջնային կարիքները հոգալու ճիշտ համակարգ ձևավորելու ուղղությամբ:

Հանձնարարվեց ՀՀ առողջապահության նախարարի հետ համատեղ առաջարկություն ներկայացնել անապահովության գնահատման համակարգում հաշվառված անապահով ընտանիքներին տրամադրվող առաջողապահական ծառայությունների հասանելիությունը և հասցեականությունը մեծացնելու ուղղությամբ:

ՀՀ մարզպետերին ու քաղաքապետերին հանձնարարվեց անձնական վերահսկողության տակ վերցնել սոցիալական աջակցության տարածքային գործակալությունների կողմից սոցիալական նպաստների և օգնության նշանակումը: