Հաջորդ տարի անվճար կրթության համակարգը կվերանայվի. ԿԳ նախարար

Պարտադիր չէ, որ երկրում բոլորն ունենան բարձրագույն կրթություն, մի մասը պետք է ունենա արհեստ, դառնա լավ արհեստագործ. «Ազատություն» ռադիոկայանի ֆեյսբուքյան ասուլիսում նման կարծիք հայտնեց ՀՀ ԿԳ նախարար Լևոն Մկրտչյանը:

Նա նշեց նաև, որ մենք պետք է փոխենք մեր վերաբերմունքն աշխատանքի նկատմամբ: «Պետք է հասկանանք` չկա անհարգալից և ստորին աշխատանք, ցանկացած աշխատանք պատվաբեր է»,- նշեց Մկրտչյանը:

Իսկ ինչ վերաբերում է ուսման վարձավճարների` մատչելի դարձնելուն, ապա, ըստ նախաարի, եթե պետությունն իր վրա չի վերցնում այդ մեծ ծախսը, ապա պետք է կարողանա մատչելի դարձնել ուսումը` կրթաթոշակների, ուսանողական վարկերի միջոցով:

«Հաջորդ տարի մենք նախատեսում ենք ունենալ անվճար կրթության ևս մեկ համակարգ. անվճար համակարգի հիմքը պետք է սոցիալական լինի, պետությունը պետք է գումար ծախսի սոցիալապես անապահով շերտի համար, ոչ թե առաջնորդվի գնահատականներով»,- ասաց նախարարը: